د ملي جنبش ګوند مشر عبدالرشید دوستم چې څه موده وړاندې د درملنې لپاره ترکیې هېواد ته تللي و، پرون بېرته هېواد ته راستون شو او وایي چې د شمال جګړهییز وضعیت په اړه ولسمشر ته یوه طرحه سپاري. د جنبش ګوند ویاند ویلي چې له ولسمشر سره به په دې لیدنه کې د لاسه تللو سیمو د بېرته نیولو لپاره د ولسي پاڅونوالو پر تجهیز هم خبرې وشي.
ولسمشر غني چې نن د ملي شورا یوې فوق العاده غونډې ته وینا کوله وویل، افغانستان باندې تېری شوی او په هېواد کې روانه جګړه پر افغانانو تحمیل شوې او د تېرې کوونکو پر وړاندې درېدل د ټولو ملي وجیبه ده. ذبیحالله مجاهد بیا ویلي، افغانان ملي خاینان څاري او د عدالت مېز ته به یې راولي او د ناسمو تورونو لګول به د ولسمشر غني د حکومت عمر را لنډ کړي.
ولسمشر محمداشرف غني نن د کابینې په لومړنۍ ډیجیټلي غونډه کې وویل، تر هغه چې وضعیت د جګړې په ډګر کې بدل نه شي، طالبان د سولې رښتینو خبرواترو ته نه حاضرېږي.
د هغه په وینا، د وضعیت د بدلون لپاره یې چمتووالی نیولی او تر راتلونکو شپږو میاشتو پورې به په بشپړ ډول بدل شي.
ولسمشر غني نن په ارګ کې د ملي بیرغ ورځې د نمانځنې په غونډه کې وویل، هېڅکله به د پردیو هغو طرحو ته تسلیم نه شي چې له هېواده بهر جوړېږي او غواړي افغانستان د جګړې پر ډګر بدل کړي.
هغه له طالبانو وغوښتل، که ملي ګټو ته ژمن وي، د هېواد د ورانۍ لامل دې نه کېږي.
ولسمشر محمداشرف غني نن د لوی اختر له لمانځه وروسته ملت ته په خپل اختریز پیغام کې پر وسلهوالو طالبانو د نیوکې په توګه وویل چې دغې ډلې د جګړې په ډېرولو سره وښوده چې سولې ته اراده نه لري او د ۵۰۰۰ طالب بندیانو خوشې کېدو، دغه ډله تراوسه د سولې په اړه جدي خبرو ته نه ده راضي کړې. ولسمشر له طالبانو وغوښتل چې د عامه تاسیساتو له ویجاړولو لاس واخلي.
د بهرنیو چارو وزیر محمدحنیف اتمر نن له خپل پاکستاني سیال شاهمحمود قریشي سره په ټیلیفوني خبرو کې ویلي چې د یاد هېواد د کورنیو چارو د وزیر څرګندونې دوهاړخیزو اړیکو او د څېړنو اعتبار ته سخت زیان رسوي.
نوموړي په اسلاماباد کې د افغان سفیر د لور قضیې په تړاو د پاکستاني چارواکو څرګندونې نامسلکي او له وخته مخکې بللې دي.
ولسمشر محمد اشرف غني نن د بلخ ولایت د امنیت وضعیت د ارزونې په موخه دغه ولایت ته سفر کړی او تمه وه چې رسنۍ د نوموړي دغه سفر ته خبري پوښښ وکړي، خو په دغه ولایت کې خبریالانو ته اجازه نه ده ورکړل شوې چې د ولسمشر دغه سفر ته خبري پوښښ وکړي.
ولسمشر محمداشرف غني چې نن سهار د خوست هوايي ډګر د پرانېستې ترڅنګ، د دغه ولایت د عمومي وضعیت ارزونې په موخه خوست ته تللی وايي، طالبان سوله نه غواړي او د پردیو لپاره جګړه کوي. هغه طالبانو ته په خطاب کې وویل، که افغانان یاست، د ډیورنډ فرضي کرښه په رسمیت مه پېژنئ او سړکونه، د اوبو بندونه او نور عامه بنسټونه هم مه نړوئ.
ولسمشر محمداشرف غني نن د کانونو اوونۍ په غونډه کې وویل چې افغان دولت په هېواد کې د جګړې پای ته رسېدو لپاره د سولې طرحه وړاندې کړه او په خبره یې، هغوی چې سوله نه کوي، باغیان دي.
د امریکا ولسمشر جو بایډن له خپل افغان سیال محمداشرف غني سره په لیدنه کې له افغانستان سره د امریکا پر دوامدارو مرستو ټينګار کړی دی. په دې لیدنه د امریکا ولسمشر جو بایډن له افغانستان څخه د امریکایي ځواکونو پر وتلو ټينګار کړی او ویلي یې دي چې له افغانستان څخه به د دغه هېواد ملاتړ دوامداره وي.
ولسمشر محمداشرف غني او ورسره مل پلاوي پرون له غرمې وروسته په واشنګټن کې د ډیموکراټانو د اکثریتو له مشر سناتور چارلز شومر او د جمهوري غوښتونکو د لږکیو له مشر سناتور میچ مکانیل او یوشمېر نورو سناتورانو سره ولیدل.
ولسمشر غني د یوه لوړپوړي پلاوي په مشري پرون ماښام امریکا ته پر سفر روان شو او نن ورسېد. له ولسمشر سره په دغه سفر کې د هغه لومړی مرستیال امرالله صالح، د ملي روغې جوړې شورا رییس عبدالله عبدالله، د بهرنیو چارو وزیر محمدحنیف اتمر، د ملي امنیت سلاکار حمدالله محب او یوشمېر نور چارواکي او د سولې مرکچي پلاوي غړي ملتیا کوي.
د ولسي جرکې غړو د یادې جرګې په نننۍ عمومي غونډه کې وویل چې ولسمشر محمداشرف غني په جګړه نه پوهېږي او همدا موضوع د دې سبب شوې چې امنیتي وضیعت خراب شي.
پرون له غرمې وروسته د کابل په لوېدیځ کې د ښاري ټرانسپورټ پر دوو مسافر وړونکو موټرو ماین چاودنې وشوې چې له امله یې ۷کسان ووژل شول او ۶نور ټپیان شول. د تېرې اوونۍ د یکشنبې پر ورځ هم په همدغه سیمه کې د ښاري ټرانسپورټ دوه ټونس ډوله موټر د نښلوونکي ماینونو ښکار شول چې له امله ۵کسان پکې ووژل شول او ۱۶ يې ټپیان کړل.
د بهرنیو چارو وزیر محمدحنیف اتمر وايي چې دغه وزارت امریکا ته د ولسمشر محمداشرف غني د سفر پر موضوع د یاد هېواد له بهرنیو چارو وزارت سره کار کوي. نوموړي دا څرګندونې نن په هرات کې د یوې خبري غونډې پر مهال وکړي او ویې ویل: «دا مفکوره شته چې یاد سفر وشي.»
د افغان سولې لپاره د امریکا د بهرنیو چارو وزارت ځانګړي استازي زلمي خلیلزاد، د طالبانو او افغان حکومت له لوري د اوربند له اعلان څخه هرکلی کړی دی. خلیلزاد بېګاه شپه په خپل ټوېټر پاڼه لیکلي چې په وروستیو اوونیو کې تاوتریخوالی ډېر وو او افغانانو یې بیه پرې کړې ده.نوموړي ټينګار کړی چې افغانان یوې سیاسي او تلپاتي اوربند ته اړتیا لري.
هغه ویلي: « مونږ د بین الافغاني خبرو، سیاسي هوکړې او د بې معنا جګړې د پای ته رسولو ژر تر ژره غوښتونکي یو، دا هغه څه دي چې د افغانستان خلک یې هیله لري.»
د سلاموطندار په اړه
نشراتي سیاست او مسلکي اصول
د خصوصي حریم سیاست
له موږ سره اړیکه
کارموندنه
د معلوماتو او سندونو لېږل
له موږ سره د همکارۍ شرایط
شکایت
راډیويي خپرونې
فلم او تصویر
آر اس اس
په خبرپاڼه کې ګډون
