د دولت سقوط او د افغان زده‌کړیالانو ناڅرګند برخلیک؛ هند ویزې نه ورکوي

یوشمېر افغان زده‌کړیالان وايي چې د اسلامي امارت له لوري د هېواد تر بشپړ کنټرول او د هند او افغانستان ترمنځ د الوتنو له دردېدو وروسته له درسونو پاتې دي.
د دوی په وینا، د هند په ګډون، نورو هېوادونو اسلامي امارت په رسمیت نه دی پېژندلی او همدا لامل دی چې دوی له زده‌کړو بې‌برخې شوي دي.

د جګړې زیاتوالي د بیان ازادي زیانمنه کړې

د بې‌پولې خبریالانو سازمان په افغانستان کې د جګړې زیاتېدو او د امنیتي وضعیت خرابېدو په اړه اندېښنه ښودلې او ویلي یې دي چې د افغان دولت او طالبانو ترمنځ د جګړې زیاتېدو د بیان ازادي ته چې په وروستیو شلو کلونو کې د هېواد مهمه لاسته‌راوړنه بلل کېږي، سخت زیان اړولی دی.
د دغه سازمان په خبره، د طالبانو له لوري د یوشمېر ولسوالیو په نیول کېدو سره د اطلاع رسونې بهیر له خنډ سره مخ شوی دی.

د درې میاشتني اوربند په بدل کې د طالبانو ناشونې غوښتنه

د سولې بین الافغاني خبرو لپاره د افغان دولت د مرکچي پلاوي ویاند نادر نادري نن کابل کې یوې خبري غوندې ته وویل چې طالب ډلې افغان دولت ته د درې میاشتني اوربند وړاندیز کړی دی.  د نادري په وینا، طالبانو د درې میاشتني اوربند په بدل کې د خپلو ۷۰۰۰ بندیانو د خوشې کېدو او د ملګرو ملتونو له تور نوملړ څخه، د دې ډلې د نوم د اېستلو غوښتنه کوي.

هغه سرتېری چې د دولت له بې‌غورۍ او نه ملاتړه شکایت کوي

په جوزجان کې د سلام‌وطندار خبریال ذکرالله یزداني د طالبانو له لوري د بریدونو ډېروالي او د یوشمېر ولسوالیو نیول کېدو ته په کتو د یوه سرتېري د زړه خبرو را اخیستو لپاره یوې داسې سیمې ته تللی چې د ودانیو پر دېوالونو یې د جګړې او ناامنۍ نښې له ورایه ښکاري.

هغه ولسوالۍ چې له دولت او طالبانو دواړو پاتې دي

له ځینو ولایتونو څخه را رسېدلي راپورونه ښيي چې په بدخشان او پروان کې ځينې ولسوالۍ د څو ساعتونو لپاره نه د دولت او نه هم د طالبانو په لاس کې وې.
د بدخشان د ولایتي شورا غړی طلب‌الدین قادري سلام‌وطندار ته ويلي چې د دغه ولایت په واخان، زېباک، شکاشم او شغنان ولسوالیو کې هېڅ جګړه نه ده شوې او له هغه وړاندې چې طالبان دغو ولسوالیو ته ورشي، امنیتي ځواکونه ترې بهر شوي وو.

د امریکا سفارت: افغان حکومت باید د بچه بازۍ د مخنیوي لپاره هڅې زیاتې کړي

 په کابل کې د امریکا سفارت په خپل ټویټرپاڼه لیکلي چې د افغانستان دولت باید د بچه‌بازۍ، انساني قاچاق او همداراز د امنیتي ځواکونو په لیکو کې د سرتېرو په توګه د ماشومانو ګومارلو د مخنیوي لپاره دې هڅې زیاتې کړي.

«د سولې طرحه کې یوازې د دولت او پخلاینې شورا نظرونه ځای شوي»

تېره ورځ ناوخته یوه طرحه چې ۱۴ مخه ده او ښايي د استانبول غونډې لپاره د افغان دولت د سولې طرحه وي، په رسنیو کې لاس پر لاس شوه.
دا طرحه چې د افغان سولې د هوکړې په نوم نومول شوې، پر څلورو بېلابېلو برخو راڅرخي او د افغانستان راتلونکې لپاره د لارښود اصول، د افغانستان سیاسي نقشه، د افغانستان راتلونکی سیاسي نظام او د جګړې پای ته رسول په‌کې شامل دي.

هلمند کې ماين چاودنې ۵ ملکيان وژلي

د هلمند محلي مسوولان وايي، په دې ولايت کې د ماین چاودنې له کبله ۵ ملکيان وژل شوي دي. د ياد ولايت د والي وياند عمر ځواک وايي، دغه پېښه نن سهار د مرکز لښکرګاه ښار کې هغه مهال شوې کله چې د ملکيانو يو موټر د سړک غاړې پر ماين وربرابر شو.

د ځواک په وينا، په دې پېښه کې ۵ ملکي کسان وژل شوي دي.

«دولت د افغان سولې لپاره د امریکا نوې طرحه ارزوي»

د دولت د سولې مرکچي پلاوي غړی او ویاند نادر نادري وايي، افغان دولت د سولې انتقالي دولت طرحه ارزوي.
نوموړي چې نن په کابل کې د افغانستان د سټراټېژیکو څېړنو انسټېټيوټ کې خبرې کولې وویل، دا طرحه په افغانستان کې د جګړې د پای او د سولې راتلو لپاره یو وړاندیز دی.
د نادري په وینا، دولت اوس دا طرحه ارزوي او باید اغېزمنتیا یې په واقعي ډول وارزوي، څو روښانه شي چې له هېواد سره مرسته کوي، که یې یوه بل اوږدمهالي ناورین ته بیايي.

ولسمشر: نړیوالې ټولنې ۴۰ کاله افغانان له سولې بې‌برخې کړي

ولسمشر محمداشرف غني نن د سرتېري ملي ورځې په مناسبت غونډه کې د وینا پر مهال وویل چې نړیوالې ټولنې ۴۰ کاله افغانان له سولې بې‌برخې پرېښي کړي دي.
د سرتېري ملي ورځ نن په ځانګړو مراسمو سره د ولسمشر او ګڼو نورو لوړپوړو چارواکو په ګډون د ملي دفاع وزارت په انګړ کې ونمانځل شوه. دا ورځ د پلازمېنې په ګډون، په ولایتونو کې هم ونمانځل شوه او خلکو خپلو سرتېرو ته د هغوی د سرښندنو ستاینې په موخه ګلان ورکړل.

د یما سیاوش پلار: دولت مې د زوی قضیې د څېړلو او د هغه د قاتل پېژندلو اراده نه لري

د ټلوېزیون یو پېژندل شوی ویاند او د افغانستان بانک سلاکار یما سیاوش د لړم میاشتې په ۱۷مه په کابل کې یوې چاودنې وواژه.
د نوموړي کورنۍ تر دې مخکې د ملګرو ملتونو له امنیت شورا نه غوښتي و چې د سیاوش د وژلو پېښه وڅېړي، خو د دغه سازمان له لوري ېې کوم ځواب ترلاسه نه کړ او نن یې د درېیم ځل لپاره له یادې شورا نه وغوښتل چې دا پېښه وڅېړي.

له خنډ او ځنډ سره د سولې خبرو د مخامخ کېدو احتمال

د امریکا او طالبانو ترمنځ د سولې هوکړه‌لیک د بیا ارزونې او له القاعده شبکې سره د طالب ډلې د اړیکو لرلو په اړه د امریکا د نوي ولسمشر جو بایډن د ملي امنیت سلاکار او د دغه هېواد د بهرنیو چارو وزیر تر څرګندونو وروسته، تازه د امریکا د دفاع وزیر هم ویلي چې په افغانستان او عراق کې به د خپلو ځواکونو پر کمېدو او حضور بیاکتنه وکړي.

«د نورو طالب بندیانو خوشې کول په هېڅ ډول د توجیه وړ نه دي»

د ولسمشر سلاکار او د ولسمشرۍ ماڼۍ د سټراټېژیکو او عامه اړیکو رییس وحید عمر وايي چې طالبانو په هېواد کې تاوتریخوالی ډېر کړی او د دې ډلې د نورو بندیانو خوشې کول په هېڅ ډول نه شي توجیه کېدای.
نوموړي نن ملت ته د دولت حساب‌ورکونې پروګرام په پرانېستونکې غونډه کې وویل چې حکومت د نورو طالب بندیانو له خوشې کولو سره مخالف دی.