په څمکنۍ ولسوالي کې د پکتیا ولایت د شپږو ولسواليو اوسېدونکو او په دغو ولسواليو کې مېشت امنیتي سرتېرو د خپلو معاشونو ترلاسه کولو او په بانکي راکړه ورکړه کې د اسانتیا په موخه په یاده ولسوالي کې د بانکي څانګې د جوړېدو غوښتنه وکړه.
د پکتیا ولایت د څمکنيو، جانيخېل، اريوب ځاځي، احمدخېلو، لجهمنګل او ډنډ پټان ولسواليو اوسېدونکي او دولتي کارکوونکي په څمکنیو ولسوالي کې چې د دغو ولسوالیو مرکز بلل کېږي، د بانکي څانګې نه موجودیت له امله له زیاتو ستونزو سره لاس او ګرېوان دي.
دوی وايي، د خپلو معاشونو اخیستو او مالي راکړې ورکړې لپاره لسګونه کیلومټره مزل کوي او د مرکز ګردېز ښار بانکونو ته ورځي او په وینا یې، یوازې د پیسو اخیستل یې نه، بلکې پر لارو شته امنیتي ګواښونه یې هم ځوروي.
د سلاموطندار پښتو فېسبوکپاڼه وڅارئ
د څمکنيو ولسوالي اوسېدونکي سيفالله او قدرت وايي، له کلونو راهيسې د څمکنيو په مرکز شهرنو ښار کې د بانک څانګې د پرانېستو غوښتنه کوي، خو په خبره يې، تر اوسه ورسره يوازې ژمنې شوې دي.
دوی وایي، که په دې سیمه کې د بانک یوه څانګه جوړه شي، د دغې ولسوالي اقتصاد به ورسره وغوړېږي، افغانۍ به ارزښت پیدا کړي او د خلکو کاروبار به هم ورسره وده وکړي. د دوی په وینا، که حکومت یادو ولسوالي ته د بانکې څانګې منظوري ورکړي، پر لویو لارو به د خلکو لوټلو ستونزه هم حل او دوی ته به اسانتیاوې برابرې شي.
په همدې حال کې مرجان چې په څمکنيو ولسوالي کې د ملي پوليسو په ليکو کې دنده لري وايي، يوازې دغې ولسوالي کې زرګونه امنيتي سرتېري مېشت دي او د معاشونو ترلاسه کولو پر مهال ګردېز ته پر لاره له ستونزو سره مخ کېږي چې څو ځله پر دې لارو د وسلهوالو له لوري پر دوی بریدونه شوي او هغه امنیتي سرتېري چې د معاشونو د ترلاسه کولو لپاره ګردېز ته روان وو، په نښتو کې ورته مرګژوبله هم اوښتې ده.
- په پکتیا، خوست او پکتیکا کې د ۷۰۰۰ ښوونکو کموالی
- کونړ او پکتیا کې د تاوتریخوالي پر وړاندې اعتراض او د اوربند غوښتنه
- پکتیاوالو د کرېکټ بورډ پر وړاندې لاریون وکړ
د نوموړي په وینا، شاوخوا ۷ زره امنيتي سرتېري، محلي پوليس، پاڅونوال، د ملي اردو درې کنډکونه او دوه هم د سرحدي ځواکونو کنډکونه پراته دي چې د معاشونو ترلاسه کولو لپاره ورته پر لاره ډېره مرګژوبله اوښتې ده.
د پکتيا والي محمدحليم فدايي هم په څمکنيو ولسوالي کې د بانک څانګې پرانېستل یوه اړتیا بولي او وايي، د دولتي او خصوصي بانکونو له مسوولينو سره یې په اړه پر خبرو بوخت دي. فدایي زیاتوي، د بانکونو ولایتي مسوولان په خپل سر د بانکي څانګې د جوړولو پرېکړه نه شي کولای او له مرکز یې غوښتي چې په دې ولسوالي کې د بانکي څانګې جوړولو ته لاره هواره کړي.
د پکتیا د شپږو ولسوالي اوسېدونکي باور لري چې په څمکنیو ولسوالي کې د بانک څانګې په پرانېستو سره به له يوې خوا خلکو ته مالي او سوداګريزې اسانتياوې برابرې شي او بلهخوا به اړونده بانکي څانګه هم ښه ګټه وکړي.
