د ملګروملتونو سرمنشي انټونیو ګوټرېش ویلي چې د افغانستان اقتصادي نظام نغدو پيسو ته اړتیا لري. نوموړي زیاته کړې چې د افغانستان اقتصادي نظام کې د نغدو پيسو کمښت به د دغه هېواد اوسېدونکو ته ناوړې پایلې ولري.
د ملګرو ملتونو سازمان له نړیوالې ټولنې غوښتنه کړې چې د افغانستان اقتصادي نظام کې د نقدو پیسو ورکړې ته زمینه برابره کړي.
د سلاموطندار پښتو فېسبوکپاڼه وڅارئ
په همدې حال کې اقتصادي کارپوهان د ملګرو ملتونو د خبرداري د تایید ترڅنګ وايي، که چېرته د افغانستان اقتصاد ته نغدې پیسې ورنه کړل شي، د هېواد اقتصادي ستونزې به حل نشي.
د اقتصادي چارو کارپوه عبدالنصیر رښتیا سلاموطندار ته وايي، هغه مرستې چې اوس له افغانستان سره کېږي، په نقدو پیسو وشي، له یوه اړخه به د کار زمینه برابره شي او له بل لوري به د افغانیو ارزښت لوړ کړي.
په ورته مهال د اقتصادي چارو یو بل کارپوه تاجمحمد تلاش هم وايي چې د اسلامي امارت له لوري د اقتصادي توکو مدیریت، تر یوه بریده په هېواد کې اقتصادي ننګونې راکمې کړې دي.
د هغه په باور که چېرته اوسنۍ ستونزې حل نشي، د هېواد اقتصادي وضعیت ته به په اوږدمهالي توګه ګواښونه متوجې شي. دا په داسې مهال ده چې واک ته د اسلامي امارت تر رسېدو وروسته، د هېواد اقتصادي وضعیت په جدي توګه زیانمن شوی دی.
له دې سره هممهاله د نړیوالې ټولنې د مرستو کمښت او د امریکا له لوري د افغانستان بانک د شتمنیو کنګلېدل، اقتصادي ناورین زیات کړی دی.
دا په داسې مهال ده چې ملګروملتونو ټينګار کړی چې دغه سازمان تراوسه شاوخوا ۵۰۰ میلیونه نغدي ډالر افغانستان ته لېږدولي دي.
