د افغانستان لپاره د امریکا ځانګړي استازي توماس وېسټ په یوه ټویټ کې ویلي چې هېواد یې له افغانستان سره د خپلو بشردوستانه مرستو په لړ کې له دغه هېواد سره ۴۷۴ میلیونه ډالر او د کورونا یو میلیون ډوزه واکسین مرسته کوي. هغه زیاته کړې چې سږ کال دغه هېواد سره په بشري مرستو کې ۴۷۴ میلیونه ډالر زیات شوي دي.
د رییس الوزرا لومړي مرستیال عبدالغني برادر نن په کابل کې له صنتکارانو سره په یوې ناسته کې له نړیوالې ټولنه وغوښتل چې اسلامي امارت په رسمیت وپېژني.
د بهرنیو اثارو پر وړاندې د افغانۍ ارزښت کمېدو په لړ کې د اسلامي امارت چارواکي وايي، یو لړ اقدامات یې ترلاس لاندې نیولي چې ورسره به د افغانیو ارزښت بېرته لوړ شي. په وروستیو څو ورځو کې د ډالر پر وړاندې د افغانۍ ارزښت په ډراماتیکه توګه راولوېده چې له امله یې په بازارونو کې د خوراکي او نورو توکو بیې لوړې شوې.
د پاکستان لومړي وزیر عمران خان پرون په لاهور کې یوه څېړنیز بنسټ ته د وینا پرمهال ویلي چې لوېدیځو رسنیو د افغانستان په قضیه کې په تېرو ۱۵کلونو کې د پاکستان د بدنامۍ هڅې کړې. نوموړي پر دغو رسنیو د دوه مخې لوبې مخته وړلو تور پورې کړ او په وینا یې، د پاکستان شهرت ته یې زیان رسولی دی.
د افغانستان په ډېرې لرې پرتو سيمو کې له کلتوري محدوديتونو سربېره نجونې ښوونځيو ته ځي او د لوړو زدهکړو هيلې لري. تازه د پکتيا مرکز ګردېز کې له ۲۴ لېسو څخه ۱۹۰۶ زدهکوونکي چې ۳۵۴ يې نجونې دي فارغې شوي.
په دې وروستیو کلونو کې د افغانستان د خلکو لپاره په نړیواله کچه د سولې پیاوړتیا، ټيکاو، د سولهییز او ښه ژوند د تضمین لپاره یو لړ هڅې روانې وې چې ازبکستان هم د افغانستان د یوه نږدې ګاونډي او په دغه هېواد کې د تلپاتي ثبات غوښتونکي هېواد په توګه هڅه کړې چې د ګډو فرهنګي او ښو اړیکو پر بنسټ خپله ونډه ادا کړي. په افغانستان کې د یوه پراخبنسته دولت څخه د ملاتړ ترڅنګ ازبکستان هڅه کوي چې د تېر په څېر د افغانستان له خلکو سره خپلو بشري مرستو ته دوام ورکړي.
نیویارک ټیمز بیګا د امریکا د دفاع وزارت/ پنټاګون د یو چارواکي له قوله لیکلي چې په کابل کې پر یو کور د هوایي برید له امله هېڅ امریکایي پوځي ته سزا نه ورکول کېږي. دغه امریکایي چارواکی ویلي د دغه هېواد د دفاع وزیر لوید استین د دوو امریکایي قومندانانو له توصیه وروسته دا پرېکړه کړې ده.
د افغانستان د کنګل شویو پیسو د ازادېدو په اړه د بهرنیو چارو وزیر امیرخان متقي د وروستیو څرګندونو په غبرګون کې تازه د سپینې ماڼۍ ویاندې په یوې خبري ناسته کې ویلي چې د امریکا له لوري د افغانستان د کنګل شویو شتمنیو ازادول پېچلې او له ننګونو ډکه موضوع ده.
وروسته له هغې چې افغانیو په کمسارې توګه د ډالرو پر وړاندې خپل ارزښت له لاسه ورکړ، کابل کې د شهزاده سرای د صرافانو ټولنې ویاند عبدالراحمان ځیرک سلاموطندار ته وویل چې د ډالرو پر وړاندې د افغانیو د ارزښت ساتلو لپاره دې د افغانستان بانک بازار ته ډالر وړاندې کړي.
له افغانستان سره د چین هېواد د بشري مرستو په لړ کې دغه هېواد نن د ۱۴ میلیونو ډالرو په ارزښت د خوراکي او ژمنیو توکو یوه جوپه کابل ته رالیږلې ده.
کندهار کې د ميرويس حوزوي روغتون د علمي شورا مسوول ډاکټر سورګل نوزادي وايي چې په تېرو ۳میاشتو کې یاد روغتون ته پر خوارځواکۍ اخته ۸۰۲ ناروغان ور وړل شوي چې له ډلې یې ۳۲ ناروغان مړه شوې دي.
د کډوالو نړیوال سازمان (IOM) پر خپل ټویټرپاڼه لیکلي چې سږ کال له ایران او پاکستان څخه تر یو میلیون ډېر افغان کډوال بېرته هېواد ته ستانه شوي او یا هم شړل شوي دي. دغه سازمان ټینګار کړی چې یاد کسان بېړنیو مرستو ته اړتیا لري او باید ملاتړ یې وشي.
د اروپايي ټولنې د بهرنیو چارو وزیران نن په بروکسل کې د افغانستان روان اقتصادي او ناوړه بشري وضعیت په اړه ناسته کوي. د جرمني د بهرنیو چارو وزارت په یوې خپره کړې ویناپاڼه کې ویلي چې په دغه ناسته کې به افغانستان ته د بشري مرستو رسولو پر وړاندې د شته خنډونو د لرې کولو او اړمنو کسانو ته د مرستو رسولو پر لارو چارو خبرې وشي.
په افغانستان کې د پاکستان سفیر منصور احمد خان په دې وروستیو کې ویلي چې د اسلامي امارت په رسمیت پېژندل، د نړیوالې ټولنې پرېکړې او همغږۍ پورې تړلی دی. د احمد خان په وینا، د اسلامي امارت د رسمیت پېژندنې لپاره د سیمې د هېوادونو هوکړه مهمه مسله ده چې د دغه هېوادونو دریځ د اسلامي امارت لپاره مهم ګڼل کېږي.
د پکتيا او پکتيکا د کرنې، اوبو لګولو او مالدارۍ رياستونو مسوولان وايي، د سږ کال په اوږد کې يې له جلغوزيو څخه ۱۰۰ ميليون افغانۍ عشر راټول کړی دی.
د بریټانیې د بهرنیو چارو وزارت اعلان کړی چې دغه هېواد له افغانستان سره ۷۵ میلیون پونډ چې ۹۹ میلیونه امریکایي ډالر کېږي، مرسته کوي. د بریټانیې د بهرنیو چارو وزیرې لیز ټراس د جي۷ هېوادونو غونډې ته په خپلې وینا کې ویلي چې د «بېړنیو مرستو» دغه کڅوړه د افغانستان خلکو ته د خوراکي توکو، روغتيايي خدمتونو، سرپناه او اوبو د برابرولو لپاره په نظر کې نیول شوې ده.
د سلاموطندار په اړه
نشراتي سیاست او مسلکي اصول
د خصوصي حریم سیاست
له موږ سره اړیکه
کارموندنه
د معلوماتو او سندونو لېږل
له موږ سره د همکارۍ شرایط
شکایت
راډیويي خپرونې
فلم او تصویر
آر اس اس
په خبرپاڼه کې ګډون
