د بغلان د ټرافیکو مدیریت مسوولان وايي چې دغه ولایت کې د یوې ټرافیکي پېښې له امله یو ماشوم مړ شوی دی.
د بغلان د ټرافیکو مدیریت د پېښو د څېړنې امر صفيالله عمري سلاموطندار ته ویلي چې نن سهار (یکشنبه، د غبرګولي څوارلسمه) یوه فیلډر ډوله موټر د دغه ولایت د شمالي سالنګ اړوند «لعلمه» سیمه کې یو ماشوم وهلی چې له امله یې مړ شوی دی.
د سلاموطندار پښتو فېسبوکپاڼه وڅارئ
د نوموړي په وینا، پېښه کې یوازې ماشوم مړ شوی دی. دا په داسې مهال دی چې په دې وروستیو کې دغه ولایت او د هېواد په یوشمېر نورو سیمو کې ټرافیکي پېښې زیاتې شوې دي.
هېواد کې ټرافیکي پېښې داسې مهال زیاتېږي چې مسوولان یې لامل د موټرو چلوونکو بېاحتیاطي، د لارو خرابوالی او له ټرافیکي قوانینو سره د موټرچلوونکو نه بلدتیا یادوي.