د کندهار د سپینبولدک ولسوالي مسوولان وايي چې دغه ولسوالي کې یوې ښځې په خپل کور کې ځان زندۍ کړی دی.
د مسوولانو په وینا، پېښه پرون شنبه د غويي ۳۰مه د سپینبولدک ولسوالي د څلورمې امنیتي حوزې اړوند د «سپینې ګومبتي» سیمه کې شوې ده.
د سلاموطندار پښتو فېسبوکپاڼه وڅارئ
د یادې ولسوالي له لوري په یوې خپره شوې خبرپاڼه کې راغلي چې یاده مېرمن ۲۲کاله عمر لري او د معروف ولسوالي اصلي اوسېدونکې ده.
په خبرپاڼه کې د دغې مېرمنې د خاوند له قوله ویل شوي چې نوموړې عصبي ناروغي لرله او له دې وړاندې یې هم دوه ځله د ځانوژنې هڅه کړې وه.
په ورته مهال خبرپاڼه کې د امنیتي ځواکونو لهخوا د یادې مېرمنې د خاوند د نیولو کېدو خبر هم ورکړل شوی دی.
دا په داسې مهال دی چې له دې وړاندې هم دغه ولایت او د هېواد په نورو ولایتونو کې ورته پېښې شوي چې مسوولانو یې لامل تر ډېره کورنی تاوتریخوالی، بېوزلي او رواني او عصبي ناروغي بللي دي.