د افغان دولت او طالبانو د مرکهچي پلاوو تماس ډلو له اوږد ځنډ وروسته پر اختلافي مواردو خبرې کړي. د افغان دولت د مرکهچي پلاوي غړي نادر نادري پر ټویټر ویلي، د تماس ډلو غونډه تېر ماښام شوې چې په کې پر اختلافي مواردو جدي خبرې شوي او هوکړه شوې چې دغه غونډې به دوام کوي.
قطر کې د طالبانو د سیاسي دفتر ویاند محمد نعیم هم ورته خبره کړي او ویلي يې دي چې د تماس ډلو غونډه کې پر پاتې اختلافي موضوعاتو بحث شوی او د غونډو پر دوام هوکړه شوې ده.
دا ناسته د تماس ډلو نهمه ناسته ده چې د دولت او طالبانو ترمنځ کېږي.
د دولت او طالبانو د مرکهچي پلاويو د تماس ډلو ترمنځ غونډې تېرو ۱۲ ورځو راهیسې په رسمي توګه نه وې ترسره شوې او ویل شوي چې دغه غونډه د افغان سولې لپاره د امریکا ځانګړي استازي زلمي خلیلزاد په منځګړیتوب شوې ده.
که څه هم دغه غونډه له اوږده ځنډ وروسته شوې، خو داسې ښکاري چې لا هم دواړه خواوې د رسمي غونډو پر کړنلارې هوکړې ته نه دي رسېدلي.
