د هرات امنیتي مسوولان وايي چې د دغه ولایت په غوریان ولسوالي کې ۱۲ ولسي پاڅونوال وژل شوي دي.
د هرات د امنیې قومانداني ویاند عبدالاحد وليزاده سلاموطندار ته وايي، د طالبانو نفوذي کسان بېګاه شاوخوا ۹ بجې د ولسي پاڅونوالو یوه مرکز ته ورغلي او ۱۲ پاڅونوال یې وژلي دي.
د نوموړي په وینا، طالبانو د یادو پاڅونوالو له وژلو وروسته د هغوی د مرکز ټولې وسلې او تجهیزات له ځان سره وړي دي. وليزاده زیاتوي، د پېښې د پټلو لپاره یې یو پلاوی ټاکلی او غوریان ولسوالي ته لېږل شوی دی.
د هرات په غوریان ولسوالي کې ځايي سرچینې وايي چې د طالبانو ۳ نفوذي کسان درې ورځې وړاندې په دې ولسوالي کې له ولسي پاڅونوالو سره یوځای شوي دي. د سرچینې په وینا، یادو درې نفوذي کسانو بېګاه پر خپلو ملګرو برید کړی او ۱۲ هغه یې وژلي دي.
طالبانو تر اوسه په دې اړه څه نه دي ویلي.
