د کابل د چاپېریال ساتنې رییس کاظم همایون وايي، د کابل هوا سرې کرښې ته نږدې شوې او که وضعیت کنټرول نه شي، د چاپېریال ساتنې اداره ښايي بیړنی حالت اعلان کړي.
د نوموړي په وینا، د کابل ښار د هوا پر پاکولو اوس هم کار روان دی او د ډېرو داسې کارونو مخه نیول شوې چې هوا ککړوي.
هغه زیاتوي، د چاپېریال ساتنې اداره له کابل ښاروالي سره د سوځېدونکو توکو لپاره د فېلټر پر لګولو کار کوي.
د کاظمي په خبره، په هغه ودانیو کې چې یاد فېلټرونه نه وي لګول شوي، جریمه کېږي.
د کابل ښار اوسېدونکي هم د ککړې هوا په اړه اندېښنه لري او زیاتوي چې د هوا ککړوالی تر جګړې کم نه دی او که مسوولې ادارې یې د سموالي او مخنیوي لپاره لازم تدابیر ونه نیسي، د ډېرو کسانو ژوند به واخلي.
د کابل ښار اوسېدونکي ترینا غزنوي او فاروق کریمي وايي، د کابل هوا ورځ تر بلې ککړېږي او پهکار ده چې مسوولې ادارې او خلک په ګډه د دغه ناورین مخه ونیسي.
د دوی په وینا، حکومت، په تېره مسوولې ادارې هم د هوا ککړوالي د مخنیوي لپاره یو منظم پلان نه لري چې د خلکو همکاري خپله او د کابل ښار د هوا پاکوالي لپاره چې له کورونا ویروس او جګړې کمه نه ده، کنټرول کړي.
پر ټولنیزو رسنیو هم یوشمېر کسانو د کابل د چټلې هوا په اړه نظرونه ورکړي دي.
د هارون بصیر په نوم د کابل ښار یوه اوسېدونکي پر خپلې فېسبوکپاڼې لیکلي چې د کابل نننۍ هوا له تنفس کولو وتلې ده.
حامد حیدري بیا لیکلي چې د ککړې هوا له کبله د رامنځته کېدونکې مړینې کچه له کورونا او جګړې لوړه ده.
د کابل ښار هوا هر کال د ژمي موسم په رانږدې کېدو سره ککړېږي. کابل ښاریان تل د هوا د ککړتیا له کبله شکایت او پر حکومت نیوکه کوي، خو مسوولې ادارې له ژمنو سره سره د کابل ښار هوا د کنټرول په برخه کې پاتې راغلې دي.