په افغانستان کې د ملګرو ملتونو استازولۍ یا یوناما ویلي چې د سږ کال د وږي په ۲۲مه د افغان دولت او طالب ډلې ترمنځ د سولې خبرو له پیلېدو وروسته د بشري حقونو ۵ فعالان او د رسنیو ۶ کارکوونکي په هدفي وژنو کې وژل شوي دي.

یوناما د «د بشري حقونو د مدافعانو او د رسنیو مسلکي کارکوونکو وژنې» په نوم یوه تازه راپور کې چې نن خپور شو، لیکلي چې د دولت او طالب ډلې ترمنځ د سولې خبرواترو له پیلېدو وروسته په افغانستان کې د بشري حقونو د ډېرو او فعالانو او د رسنیو کارکوونکو د وژل کېدو شاهدان دي او په وینا یې، دغه کار د رسنیو او بشري حقونو لپاره د کار فضا بدله کړې ده.

په دغه راپور کې، د رسنیو د کارکوونکو او د بشري حقونو د فعالانو د وژنې اطلاعات او پېښې د ۲۰۱۸ کال د جنوري میاشتې له لومړۍ نېټې د ۲۰۲۱ کال د همدې میاشتې تر ۳۱مې نېټې پورې تجزیه او تحلیل شوي دي.

د یوناما د راپور له مخې، د ۲۰۱۸ کال د جنوري له لومړۍ نېټې د ۲۰۲۱ کال د جنوري تر ۳۱مې پورې د رسنیو د هغو کارکوونکو او د بشري حقونو د فعالانو شمېر ۶۵ ته رسېدلی چې په افغانستان کې وژل شوي دي. په دې ډله کې ۳۲ کسان د بشري حقونو فعالان او ۳۳ نور هم د رسنیو کارکوونکي دي.

د راپور پر بنسټ، د دولت او طالب ډلې ترمنځ د سولې خبرو له پیلېدو راهیسې چې د رسنیو ۶ کارکوونکي او د بشري حقونو ۵ فعالان په‌کې وژل شوي، د دغو وژنو بهیر د مسوولیت له منلو سره مل و او دغه وضعیت خلکو ته وېره پیدا کړې ده.

یوناما وايي، د رسنیو د کارکوونکو او د بشري حقونو د فعالانو د وژلو لړۍ دوام لامل شوی چې یوشمېر کسان چوپتیا غوره کړي، خپلې دندې پرېږدي او یا هم د ځان ژغورلو لپاره د خپل کور او ټولنې پرېښودو ته اړ شوي دي.

راپور لیکي: «د پېژندل شویو شخصیتونو په ګډون، ګڼ‌شمېر کسان له هېواده تښتېدلي دي. دغو وژنو پر ټولنې ژور اغېز پرېښی او د سولې هڅو ته د خلکو هیلې کموي.»

د یوناما د راپور له مخې، په روان کال کې شویو او روانو هدفي وژنو او ترورونو چې مسوولیت یې هم څوک نه اخلي، د تېرو کلونو په وژنو کې یو ستر بدلون راوستی دی.

د افغانستان لپاره د ملګرو ملتونو ځانګړې استازې ډیبرا لاینز وايي، افغانان د یوې داسې فضا وړ دي او ورته اړتیا لري چې ارامه وي، خلک په‌کې فکر وکولای شي، ولیکي او په ازاد ډول او له وېرې پرته خپل نظریات ووايي.

د هغې په خبره، د هرې پرانېستې او وړ ټولنې لپاره د بشري حقونو د فعالانو او رسنیو غږ اړین دی او اوس چې په افغانستان کې د خبرو له لارې د جګړې د پای ته رسولو لپاره هڅه کېږي، تر بل هر وخته باید د بشري حقونو د فعالانو او د رسنیو غږ واورېدل شي، خو په وینا یې، نور هم چوپ کېږي.

د یوناما راپور لیکي، هغه کسان چې د نړیوالو بشردوستانه قوانینو او د بشري حقونو قانون د نقض په اړه د معلوماتو وړاندې کولو په برخه کې د افغانستان لپاره کار کوي، ډېر کله له ګواښ، ځورونې، څارنې یا په خپلسرې توګه له بندي کېدو سره مخامخېږي.

یوناما زیاتوي، ټول لوري د بشري حقونو د فعالانو او د رسنیو کارکوونکو د ترور مخنیوي په برخه کې مهم رول لري او دا وژنې باید په خپلواکه، بې‌پرې، ژر، کره، د باور وړ او راڼه ډول وڅېړل شي.

یوناما د بشري حقونو نړیوال قانون او نړیوال بشردوستانه قانون پر بنسټ، د دولت مقابل لوري ته د بشري حقونو د مدافعانو، خبریالانو او د رسنیو کارکوونکو د وژلو روانې لړۍ د درول کېدو وړاندیز کړی دی.

پدې خبر پورې اړوند:

شریک یې کړی:
به اشتراک گذاری بر روی facebook
به اشتراک گذاری بر روی twitter
به اشتراک گذاری بر روی telegram
به اشتراک گذاری بر روی whatsapp
به اشتراک گذاری بر روی email
به اشتراک گذاری بر روی print
د نن ورځې خبرونه
تحلیلونه او خبري راپورونه

خبرونه د ټولنیزو شبکو سایټونو سلام دوستانو تعقیبوي:

فیسبوک

توییتر

تلگرام