په وروستیو لسو ورځو کې د وسله‌والو طالبانو نفوذي کسانو په تخار، کندوز بادغېس او غور ولایتونو کې خپل ۹ ملګري وژلي او د پوستو نظامي تجهیزات یې له ځان سره وړي دي.

طالبانو په تېرو شپږو مېاشتو کې نفوذي بریدونه نه وو کړي، خو اوس یې یو ځل بیا ورته مخه کړې ده. د دې ډلې یوه نفوذي کس د وري په ۲۵مه د کندوز د پنځمې امنیتي حوزې مرستیال له دوو سرتېرو سره وواژه او له تجهیزاتو او یوه هاموې ټانګ سره یوځای طالبانو ته ورغی.

له دې پېښې وروسته د وري په ۲۶مه د تخار په دشت‌کلا ولسوالي کې د طالبانو یوه نفوذي کس د شپې پر مهال خپل درې ملګري ووژل او د پوستې ټول تجهیزات یې له ځان سره یووړل. د تخار چارواکي وایي، په دې پېښه کې دوه پولیس هم وژل شوي دي.

د نظامي او استخباراتي چارو کارپوه محمود حیدري وایي، په بېلابېلو لوریو پورې د کشفي او استخباراتي ادارو تړاو او د یادو بنسټونو کمزورتیا د دې لامل شوې چې طالبان او نورې ترهګرې ډلې په اسانۍ نظام ته لاره پیدا کړي.

د طالبانو نفوذي کسان د تخار او کندوز تر څنګ، په غور کې هم ارام نه دي ناست. دوی په دغو ولایتونو کې یو کلاشینکوف، یوه پیکا او یو راکېټ له ځان سره وړي او د وسله‌والو طالبانو لیکو ته ورغلي دي.

دغه راز، په یوه تازه پېښه کې د وسله‌والو طالبانو یوه نفوذي کس تېره شپه په بادغېس کې د سنګر درې ملګري وژلي او د پوستې نظامي تجهیزات یې له ځان سره وړي دي.

د تخار، کندوز، غور او بادغېس ولایتونو وروستۍ پېښې د دې ښکارندویي کوي چې طالبانو یو وار بیا نفوذي بریدونو ته زور ورکړی، خو د کورنیو چارو وزارت چارواکي وایي چې اوس یاد بریدونه کم شوي دي.

د کورنیو چارو وزارت ویاند طارق ارین وایي، د سرتېرو د جلب او جذب د روڼتیا او اصلاحاتو په پایله کې د وسله‌والو طالبانو د نفوذي سرتېرو بریدونه کم شوي دي.

د نوموړي په وینا، یوشمېر هغو نفوذي کسانو چې وړاندې یې د پولیسو لیکو ته لاره پیدا کړې، دا ډول جنایتونه کوي.

نظامي کارپوهان وایي، د مخالفې ډلې د نفوذي کسانو بریدونه او د هېواد د امنیتي ځواکونو په لیکو کې یې د ځای پر ځای کولو څرنګوالی هغه ننګونه ده چې تل یې افغان حکومت ګواښلی او په‌کار ده چې په دې برخه کې لا جدي کار وشي.

پدې خبر پورې اړوند:

شریک یې کړی:
به اشتراک گذاری بر روی facebook
به اشتراک گذاری بر روی twitter
به اشتراک گذاری بر روی telegram
به اشتراک گذاری بر روی whatsapp
به اشتراک گذاری بر روی email
به اشتراک گذاری بر روی print
د نن ورځې خبرونه
تحلیلونه او خبري راپورونه

خبرونه د ټولنیزو شبکو سایټونو سلام دوستانو تعقیبوي:

فیسبوک

توییتر

تلگرام