د بې‌پولې خبریالانو سازمان وايي، افغان حکومت باید د خبریالانو د خوندیتوب لپاره خپل ټول توان وکاروي. د دغه بنسټ په وینا، افغانستان په ۲۰۲۰ کال کې د خبریالانو لپاره تر ټولو خونړی هېواد و چې د غور غږ راډیو د مسوول بسم‌الله عادل په ترور سره ۲۰۲۱ کال هم په نړۍ کې د خبریالانو په وژل کېدو پیل شو.

دغه سازمان په یوه خبرپاڼه کې ویلي چې د سولې خبرواترو پر مهال په افغانستان کې د خبریالانو پر وړاندې تاوتریخوالی او ګواښونه ډېر شوي او دغه هېواد په نړۍ کې د خبریالانو لپاره تر ټولو خونړی هغه دی.

د بې‌پولې خبریالانو د سازمان شمېرو له مخې، په تېرو نږدې دوو کلونو کې لږترلږه ۱۰۰ مدني او حکومتي فعالان په افغانستان کې وژل شوي چې له ډلې یې ۴ خبریالان او د رسنیو یو بل کارکوونکی یوازې په تېرو دوو میاشتو کې وژل شوی دی. دغه سازمان ټینګار کوي چې په افغانستان کې د خبریالانو د وژنې او ترور د پای ته رسولو لپاره به د نړۍ په کچه د عدالت غوښتنې ټولې لارې چارې وکاروي.

د یادونې ده چې د سږ کال له لړم تر مرغومي میاشتې پورې د طلوع ټلوېزیون پخوانی ویاند یما سیاوش، په هلمند کې د ازادي راډیو خبریال الیاس داعي، د غزني د خبریالانو اتحادیې رییس رحمت‌الله نېکزاد، په ننګرهار کې د انعکاس ټلوېزیون ویانده ملاله میوند او د غور غږ راډیو مسوول مدیر بسم‌الله عادل په چسپکي ماینونو او وسله‌والو بریدونو کې وژل شوي دي.

دغه راز، په دې موده کې څو څارنوالان، د بشري حقونو مدافعان، مدني او د ښځو برخې فعالان هم په هدفي بریدونو کې وژل شي دي. حکومت تراوسه د دغو وژنو او ترورونو په اړه بشپړ جزیات نه دي ورکړي. تراوسه هېچا یا وسله‌والې ډلې هم د دغو بریدونو مسوولیت پر غاړه نه دی اخیستی.

که څه هم امنیتي مسوولان دغه هدفي وژنې او ترورونه د طالبانو کار بولي، خو یاده ډله په ورته پېښو کې خپل لاس لرل ردوي.

پدې خبر پورې اړوند:

شریک یې کړی:
به اشتراک گذاری بر روی facebook
به اشتراک گذاری بر روی twitter
به اشتراک گذاری بر روی telegram
به اشتراک گذاری بر روی whatsapp
به اشتراک گذاری بر روی email
به اشتراک گذاری بر روی print
د نن ورځې خبرونه
تحلیلونه او خبري راپورونه

خبرونه د ټولنیزو شبکو سایټونو سلام دوستانو تعقیبوي:

فیسبوک

توییتر

تلگرام