د امریکا د بهرنیو چارو وزارت د بشري حقونو په اړه کلني راپور کې ویلي چې په ۲۰۲۰ میلادي کال کې د افغانستان په ګډون، په ټوله نړۍ کې د بشري حقونو د نقض خبر ورکړی دی. په دغه راپور کې لیکل شوي چې افغان حکومت د چارواکو د ناوړه ګټې اخیستنې په برخه کې اغېزناک او دوامداره څېړنې نه دي کړي.

په راپور کې زیاته شوې: «د قانون حاکمیت ته نه پام او له سزا نه د بشري حقونو د ناقضانو خوندیتوب تر ټولو ستره ستونزه وه. دولت په اغېزناک او دوامدار ډول د امنیتي ځواکونو په ګډون، د چارواکو ناوړه ګټه اخیستنه نه ده څارلې.»

خو افغان حکومت د دغه راپور د رد تر څنګ وايي، د هر حکومتي چارواکي پر وړاندې چې بشري حقونه یې نقض کړي، قانوني او جدي اقدام شوی دی.

د ولسمشر د ویاند مرستیال دواخان مینه‌پال وايي، حکومت، په تېره ولسمشر غني د بشري حقونو او ملکي وګړو د خوندیتوب په برخه کې مسوولو چارواکو ته جدي سپارښتنې کړې دي.

د نوموړي په وینا، د بندخونو وضعیت په دوامداره توګه څارل کېږي او هر چارواکي چې د بشر حقونه نقض کړي، قانوني چلن ورسره شوی دی.

مینه‌پال زیاتوي، طالب وسله‌والې ډلې تر ټولو ډېر د بشر حقونه نقض کړي او په خبره یې، جنګیالي یې ملکي وګړي د سپر په توګه کاروي او د خلکو له کورونو یې سنګرونه جوړ کړي دي.

د امریکا د بهرنیو چارو وزارت د راپور له مخې، په ۲۰۲۰ میلادي کال کې د ترهګرو وژنې، د امنیتي ځواکونو له لوري وژنې او د جګړې د ښکېلو لوريو بې‌رحمانه او ناانساني سزا ورکول، خپل سرې یرغمل نیونې، د خلکو ورکېدل او تښتونې، پراخ فساد، د ښځو پر وړاندې د شویو قضیو نه څېړل، د سرتېري په توګه د ماشومانو ګومارنې او ترې ناوړه جنسي ګټې اخیستنې، د لږکیو په نښه کول، د ښځو، خبریالانو او مدني فعالانو پر وړاندې له تاوتریخوالي ډکو ګواښونو ډېروالی او ترورونه په افغانستان کې د بشري حقونو د نقض موارد دي.

پدې خبر پورې اړوند:

شریک یې کړی:
به اشتراک گذاری بر روی facebook
به اشتراک گذاری بر روی twitter
به اشتراک گذاری بر روی telegram
به اشتراک گذاری بر روی whatsapp
به اشتراک گذاری بر روی email
به اشتراک گذاری بر روی print
د نن ورځې خبرونه
تحلیلونه او خبري راپورونه

خبرونه د ټولنیزو شبکو سایټونو سلام دوستانو تعقیبوي:

فیسبوک

توییتر

تلگرام