سیاست
د ولسي جرګې غړيو د برېښنا شرکت د پوروړو وکیلانو د لېست افشا پر سر لفظي شخړه وکړه
د برېښنا شرکت رييس امان الله غالب نن د برېښنا بيې په اړه د معلوماتو ورکړې لپاره ولسي جرګې ته غوښتل شوی و.
وروسته تر دې چې غالب د برېښنا پوروړو د نوملړ اعلانولو غوښتنه وکړه، دا پرېکړه او غوښتنه یې له غبرګونونو سره مخ شوه.
د ولسي جرګې یو شمېر غړيو غوښتنه وکړه چې دا لېست دې خپور شي، خو یو شمېر نورو وکیلانو وغوښتل چې د برېښنا بیې راټیټولو لپاره دې جدي ګام واخیستل شي.
د ولسي جرګې غړی رمضان بشردوست وايي چې د برېښنا د پوروړو لیست دې افشا شي.
خو د ولسي جرګې بله غړې فاطمه عزیزي وايي چې د برېښنا شرکت د پوروړو د لېست افشا پرځای دې د برېښنا بيې راټیټولو لپاره ګام پورته شي.
د ولسي جرګې د غړيو لفظي شخړه ددې لامل شوه چې د ولسي جرګې مرستیال امیرخان چې د جرګې ریاست یې تر غاړې و له غالب وغوښتل، ترڅو په یوه بله جلسه کې د مقروضو وکیلانو لېست د ولسي جرګې استازيو سره شریک کړي.
د برېښنا شرکت وايي، یو شمېر وکیلانو او زورواکو له څو کلونو راهيسې د برېښنا د لګښت پیسې نه دي ورکړي چې دې موضوع د برېښنا لپاره ستونزې پیدا کړې دي.
