سیاست
له طالب پلاوي د اوزبکستان پر هرکلي د بهرنیو چارو وزارت نیوکه
د بهرنیو چارو وزارت په اوزبکستان کې د دغه هېواد د چارواکیو له لوري د طالب پلاوي د هرکلي پر ډول نیوکه کړې ده.
دغه وزارت ویلي، د اوزبکستاني چاروایکو له لوري د طالب پلاوي رسمي هرکلی ښيي چې یاد هېواد د افغان سولې خبرو اترو ته د اسانتیاوو برابرولو په لټه کې نهدی.
د بهرنیو چارو وزارت ویاند صبغت احمدي پر خپلې فېسبوکپاڼې لیکلي چې د افغانستان ګاونډیان باید د دغه هېواد او خلکو په رهبرۍ او مالکیت د افغان سولې پروسې ته درنښت وکړي.
په هغو تصویرونو کې چې د طالب ډلې ویاند ذبېحالله مجاهد پر خپلې ټویټرپاڼې خپاره کړي، لیدل کېږي چې اوزبکستاني چارواکیو د هغه طالب پلاوي چې دغه هېواد ته ورغلی، تر ډېره رسمي او تود هرکلی کړی دی.
اړوند مطالب:
د سولې هوکړه د اختر په ورځو کې لاسلیک کېږي
«يوناما دې د جګړې په پای ته رسېدو کې مرسته وکړي»
په یادو تصویرونو کې لیدل کېږي چې د اوزبکستان د بهرنیو چارو وزارت عبدالعزیز کاملوف او د اوزبکستان د ولسمشر ځانګړی استازی عصمت ایرګاشیف د طالبانو د استازیو هرکلی کوي.
طالب استازي په قطر کې د افغان سولې لپاره د امریکا د بهرنیو چارو وزارت له ځانګړي استازي زلمي خلیلزاد سره تر څو ورځنیو خبرو اترو وروسته اوزبکستان ته تللي دي.
په دغه سفر کې د طالب پلاوي مشري هم ملابرادر کوي.
