د روانې اوونۍ په وروستیو درې ورځو کې د چاودنو، ځانمرګو بریدونو، ماین چاودنو، هوایی بمباریو او وسلهوالو نښتو له کبله د هېواد په ۹ ولایتونو کې ۱۳۶ کسان چې ملکي وګړي، امنیتي او د فاعي سرتېري او طالبان وژل شوي او ۱۸۹ نور ټپیان شوي دي.
د راپورونو له مخې، په تېرو درې ورځو کې ۴۲ امنیتي ځواکونه ۶۰ طالبان او ۲۹ ملکيان وژل شوي او د ۱۲۴ ملکي وګړیو په ګډون، ۶۱ امنیتي ځواکونه او ۴ طالبان ټپیان شوي هم دي.
د راپورونو پر اساس، په کندهار کې ۷ پولیس وژل شوي او په هلمند کې بیا ۱۵ طالبان وژل شوي او دوه کسه یې ټپیان شوي دي. دغه راز په بغلان کې دوه پولیس او ۹ طالبان وژل شوي او اته پولیس ټپیان دي. په فاریاب ولایت کې ۳۶ طالبان او ۴ امنیتی ځواکونه وژل شوي، خو په هرات کې بیا ۳ کسان وژل شوي ۳۲ ملکي وګړي ټپیان شوي دي. دغه راز په لوګر کې ۱۴ طالبان، په پکتیا کې ۷ امنیتي ځواکونه او په جوزجان کې هم ۱۷ امنیتي ځواکونه وژل شوي دي.
یوازې د تېرې ورځې برید په پایله کې چې د کابل ښار په شپږمه امنیتي حوزه کې وشو، ۱۴ کسان پهکې ووژل شول او ۱۴۵ نور ټپیان شول.
اړوند مطالب:
د کابل نننی برید؛ ۱۴ کسان وژل شوي او ۱۴۵ ټپیان دي
پکتیا؛ طالبانو اووه سرتېري وژلي
د پېښې عیني شاهدان محمد او حزبالله وايي، د چاودنې غږ دومره زورور و چې د پېښې له سیمې نه یې ۵۰۰ متره لرې هم د ودانیو ښيښې ماتې کړې دي.
د کورنیو چارو وزارت ستر امنیتي مرستیال خوشحال سادات له یاد برید نه پوره شپږ ساعته وروسته په کابل کې یوې خبري غونډې ته وویل چې په برید کې ۱۴ کسان وژل شوي او ۱۴۵ نور ټپیان دي چې له ډلې یې ۹۲ ملکي وګړي او پاتې یې ملي پولیس دي.
خوشحال سادات زیاته کړه، طالبانو له امنیتي ځواکونو سره په مخامخ جګړه کې ماتې خوړلې او همدا لامل دی چې ځانمرګو بریدونو ته یې مخه کړې ده.
په همدې حال کې د ملي امنیت عمومي ریاست په خبرپاڼه کې لیکل شوي، د افغان ګډو ځواکونو له لوري د کابل په اتمې او پنځلسمې ناحیو او دغه راز په بګرامیو ولسوالي کې د داعش ډلې پر وړاندې کړیو عملیاتو کې د یادې ډلې دوه ځانمرګي بریدګر وژلي دي.
په خبرپاڼه کې زیاته شوې چې د یادو عملیاتو پر مهال د ملي امنیت او ملي پولیسو درې سرتېري هم وژل شوي، خو په وینا یې، پهدې سره یې په کابل ښار کې د څو ترهګریزو بریدونو مخه نیولې ده.
ملي امنیت د تېرې شپې عملیاتو موخه په کابل کې د داعش ډلې د ځانمرګو بریدونو د واسکټونو او موټربم کارخونو له منځه وړل په ګوته کړي دي.
بلهخوا ولسمشرۍ ماڼۍ په یوه خپره کړې خبرپاڼه کې لیکلي چې ولسمشر محمداشرف غني ټولو امنیتي ادارو ته لارښوونه کړې چې د ټول هېواد، په تېره د لویو ښارونو او کابل امنیت خوندیتوب ته جدي پام وکړي.
