د ټاکنو څارونکي او خبریالان وايي، د ټاکنو خپلواک کیمسیون د رای ورکونکو د تقویتي نوملیکنې بهیر د اطلاعاتو کنټرولولو هڅه کوي.

پر ټاکنو یوشمېر څارونکي بنسټونه او خبریالان د ولسمشري ټاکنو لپاره د رای‌ورکوونکیو د تقویتي نوم‌لیکنې بهیر په اړه د اطلاعاتو نه ورکولو په اړه اندېښمن دي او د کمېسیون دغه کار په راتلونکیو ټاکنو کې درغلیو ته د لارې هوارول او د قانون تر پښو لاندې کولو لپاره پلان شوی بولي.

د افغانستان د ازادو او عادلانه ټاکنو بنسټ یا فیفا اجرایوي رییس یوسف رشید سلام‌وطندار ته وویل چې په ولایتونو کې د ټاکنو خپلواک کمېسیون مسوولان د رای‌ورکوونکیو د تقویتي نوم‌لیکنې په بهیر کې د شمېرو له ورکولو ډډه کوي چې په وینا یې، دا موضوع د ټاکنو روڼتیا له پوښتنې سره مخ کوي.

د رشید په وینا، د ټاکنو خپلواک کمېسیون د ولسمشري ټاکنو لپاره د تقویتي نوم‌لیکنې بهیر د شمېرو پټولو هڅه کوي او غواړي تر یوې کچې د نیوکو او شکایتونو مخه ونیسي او په جعل‌کارۍ کې یې هم لاس پرانېستی وي.

یوسف رشید زیاتوي، د ټاکنو کمېسیون محلي مسوولان د تقویتي نوم‌لیکنې بهیر په اړه د معلوماتو نه ورکولو لامل، په کابل کې د ټاکنو خپلواک کمېسیون د امر عملي کول بولي.

د رای‌ورکوونکیو د تقویتي نوم‌لیکنې له بهیره څارونکیو بنسټونو ته د اطلاعاتو نه ورکولو ننګونه یوازې پر دې نه خلاصېږي، بلکې په ولایتونو کې یوشمېر خبریالان هم اطلاعاتو ته د نه لاسرسي له ستونزې سره مخ دي.

د خبریالانو په وینا، کله چې د ټاکنو کمېسیون له ولایتي دفترونو نه د تقویتي نوم‌لیکنې بهیر د شمېرو په اړه معلومات غواړي، ورته ویل کېږي چې د ټاکنو خپلواک کمېسیون په امر د معلوماتو ورکولو اجازه نه لري.

د غزني د ټاکنو ولایتي کمېسیون رییس عبدالبصیر مومند په یاد ولایت کې د سلام‌وطندار خبریال د پوښتنې په ځواب کې ویلي چې د ټاکنو کمېسیون ورته ویلي چې د نوم‌لیکنې ټولې شمېرې په مرکز کې راټولېږي او بیا یې په اړه رسنیو ته معلومات ورکول کېږي.

په تخار ولایت کې د سلام‌وطندار خبریال عرفان برزګر هم وايي چې د ولسمشري ټاکنو لپاره د تقویتي نوم‌لیکنې اطلاعاتو ته د لاسرسي په برخه کې له ستونزو سره مخ دی او چارواکي خبریالانو ته اطلاعات نه ورکوي.

هڅه مو وکړه چې د ټاکنو خپلواک کمېسیون نظر هم واخلو، خو له پرله‌پسې اړیکو وروسته بیا هم بریالي نه‌‌‌شوو.

د ولسمشري ټاکنو لپاره د تقویتي نوم‌لیکنې بهیر د هېواد په ۳۳ ولایتونو کې پیل شوی او دغه بهیر د غبرګولي په ۱۸مې پیل شوی او د چنګاښ تر اتمې دوام کوي.