منابع مردمی در ولسوالی درقد ولایت تخار به سلام‌وطندار می‌گویند که صبح امروز چهار جنگندۀ ارتش تاجیکستان بر بخش‌هایی از ولسوالی درقد حمله کرده‌اند.
به گفتۀ این منابع، جنگنده‌های تاجیک جنگل مشترک، اچه‌گذر و کهنه‌خانه را هدف قرار داده‌اند.
جواد هجری سخنگوی والی تخار می‌گوید، درگیری میان قاچاقچیان و مرزبانان تاجیک عصر روز گذشته هنگام عبور قاچاقچیان از مرز آغاز شده و در جنگ میان دو طرف دو مرزبان تاجیک کشته شده‌اند.
به گفتۀ سخنگوی والی تخار، پس از کشته‌شدن مرزبانان تاجیک، جنگنده‌های تاجیکستان ساعت ۷ صبح امروز بخش‌هایی از ولسوالی درقد را مورد حمله قرار داده و بیشتر مناطق زیر حاکمیت طالبان را هدف قرار داده‌اند.
خلیل اسیر سخنگوی پولیس تخار نیز می‌گوید، در حملۀ جنگنده‌های ارتش تاجیکستان، ۶ طالب مسلح کشته شده و ۹ تن دیگر زخم برداشته‌اند.
گروه طالبان تاکنون در این مورد چیزی نگفته است.
درقد مرکز فعالیت طالبان در ولایت تخار است و افراد این گروه بیشتر از ۹۰ درصد خاک این ولسوالی را در کنترل دارند.
