حبیب‌الله شباب، از هنرمندان محلی‌خوان هلمند است که در تمام نقاط کشور علاقه‌مندان خودش را دارد.
شباب می‌گوید، به علت افزایش ناامنی‌ها شماری از هنرمندان دست از کار کشیده‌اند. به گفتۀ این آوازخوان محلی، یگانه راه درآمد هنرمندان محلی هنرشان است، اما ناامنی سبب شده برنامه‌های تفریحی اندک برگزار شود و آنان نتوانند در این برنامه‌ها شرکت کنند.
شباب می‌گوید، تا کنون پنج آوازخوان محلی در هلمند هنرشان را رها کرده‌اند.
شماری از باشنده‌گان هلمند نیز با ابراز نگرانی از وضعیت ناگوار هنرمندان محلی می‌گویند، اگر از هنرمندان محلی حمایت نشوند، دیر یا زود هنر محلی از بین‌رفته و جایش را موسیقی غربی خواهد گرفت.
ریاست اطلاعات و فرهنگ هلمند مشکلات هنرمندان را می‌پذیرد و می‌گوید، تلاش دارند مشکلات اقتصادی هنرمندان محلی را حل کنند.
مطیع‌الله یاسین، مسئول تنظیم فعالیت‌های هنری در ریاست اطلاعات و فرهنگ هلمند می‌گوید، علت اصلی رکود هنر محلی ناامنی است.
به گفتۀ هنرمندان محلی، از 35 محلی‌خوان در ولایت هلمند تا کنون 10 تن شان در جریان چند سال گذشته از هنر دست کشیده‌اند و حدود 25 تن دیگر با وجود تمام مشکلات به فعالیت‌های هنری‌شان ادامه می‌دهند.
