محمداشرف غنی، رئیس جمهور افغانستان با هیأت عالی‌رتبۀ جمهوری اوزبیکستان، در ارگ ریاست جمهوری دیدار کرد.
به نقل از خبرنامۀ ریاست جمهوری، ویکتور محمودوف، مشاور امنیت ملی و عبدالعزیز کاملوف، وزیر خارجۀ اوزبیکستان که در ترکیب این هیأت حضور دارند، به محمداشرف غنی پیشنهاد کرده‌اند، در صورتی که طالبان آماده گفت‌وگوی مستقیم با حکومت افغانستان باشند، اوزبیکستان حاضر است این نشست را در شهر تاریخی سمرقند میزبانی کند.
به نقل از محمد اشرف غنی در اعلامیه آمده است که رئیس جمهور از پیشنهاد اوزبیکستان قدردانی کرده و آن شهر را میراث مشترک فرهنگی هر دو کشور افغانستان و اوزبیکستان توصیف کرده است.
شهرسمرقند به دلیل گذشتۀ تاریخی‌اش بلندآوزه است و باشندگان کشورهای آسیای‌میانه به آن شهر به عنوان یکی از مراکز فرهنگی می‌نگرند.
حکومت اوزبیکستان به رهبری شوکت میرضیایوف تمایل زیادی به همکاری در روند صلح افغانستان دارد. پیش از این اوزبیکستان اعلام کرده بود که حاضر است به صورت بی‌طرف در گفت‌وگوهای صلح نقش بازی کند.
حکومت اوزبیکستان در حالی از آمادگی‌‌ها برای میزبانی گفت‌وگوهای صلح بین حکومت افغانستان و گروه طالبان خبر می‌دهد که گروه طالبان هیچ تمایلی برای آغاز گفت‌وگو با حکومت افغانستان نشان نداده‌اند. آنان حکومت افغانستان را دست نشاندۀ ایالات متحدۀ آمریکا توصیف می‌‍‌کنند و به همین دلیل حاضر به مذاکره با حکومت افغانستان نیستند.
از جانب دیگر در آستانۀ برگزاری دور تازۀ گفت‌وگوهای صلح قطر، گزارش شده که حکومت افغانستان در پی تشکیل یک هیأت گفت‌وگوکنندۀ فراگیر برای صلح با طالبان است.
در همین زمینه
