مسئولان محلی جوزجان می‌گویند که جنگ‌جویان گروه طالبان از باشنده‌گان این ولایت به بهانۀ پیش‌گیری از گسترش ویروس کرونا به جبر پول می‌گیرند.
عبدالمعروف آذر، سخنگوی والی جوزجان به سلام‌وطندار می‌گوید که افراد گروه طالبان از باشنده‌گان ولسوالی‌های آقچه، مردیان و منگجیک این ولایت پول جمع‌آوری کرده‌اند.
باشنده‌گان جوزجان طالبان را به بی‌رحمی متهم می‌کنند و می‌گویند که در وضعیت فعلی، این گروه «بدتر از ویروس کرونا» عمل می‌کند و به کارهای غیرانسانی متوسل می‌شود.
باشنده‌گان جوزجان می‌گویند که افراد گروه طالبان از هر خانواده بین 1000 تا 1500 افغانی پول می‌گیرند. به گفته آنان، طالبان هشدار داده‌اند، در صورتی که خانواده‌ها این مقدار پول را نپردازند، شکنجه و یا کوچ اجباری داده خواهند شد.
اما ذبیح‌الله مجاهد، یکی از سخنگویان گروه طالبان ادعای حکومت محلی جوزجان را رد می‌کند و می‌گوید که شماری از موسسات و نهادهای بین‌المللی به آن‌ها در امر مبارزه با ویروس کرونا وعده همکاری داده‌اند.
