سمنگان ولایتی نینگ مرکزی آیبیک شهریده مذکور ولایت نینگ محلی مسؤوللری و سپورت ملازملری تامانیدن بیر سپورت مجموعه‌سی نینگ تمل تاشی قوییلدی.
سمنگان ولایتیده شهر قوریش و ییر بوتونلیک اداره‌سی باشلیغی شیرمحمد امیدنینگ ایتیشیچه، اوشبو سپورت مجموعه‌سی گه فوتبال، بسکتبال، والیبال میدانلری و اداری بناسی شامل بوله‌دی.
اونگه کوره، اوشبو مجموعه آلتی یریم جریب ییرده قوریله‌دی و 3 مینگ دن آرتیق تماشاچی گه جای بیره‌دی.
اوشبو مجموعه نینگ قوریلیش ایشی 43 میلیون افغانی خرجت کوتره‌دی و بودجه‌سی شهرقوریش وزیرلیگی نینگ رواجلنتیریش بودجه‌سیدن توللنه‌دی و قوریلیش ایشی 18 آی جریانیده یکونلنیب فایده‌لنیش گه تاپشیریله‌دی.
سمنگان حاکمی اورین باسری صفت‌الله سمنگانی نینگ ایتیشیچه، اوشبو ولایت سپورتچی‌لری تورلی بولیم‌لرده یوتوق قولگه کیریتیشگن و شو یوزه‌دن دولت دن بو ولایتده بیر سپورت مجموعه‌سی قوریلیشی‌نی طلب قیلیشگن ایکن.
سمنگان ولایتیده سپورت آمریتی نینگ مسؤولی حمیدالله فیضی، دولت نینگ بو حرکتی‌نی خوش قرشی‌لب ایتیشیچه، اوشبو ولایت سپورتچی‌لری بو مجموعه قوریلگنیدن سونگ، کوپراق یوتوق قولگه کیریتیش‌لری ممکن. اونگه کوره، بو مجموعه فعالیت گه باشله‌گنیدن کیین یاشلر کوپلب سپورت گه قیزیقیشه‌دی.
سمنگان محلی مسؤوللری نینگ ایتیشیچه، اوشبو سپورت مجموعه‌سی نینگ قوریلیش ایشی باشلنگنده، اونلرچه کیشی ایش بیلن تأمین‌لنیشی ممکن.
