افغانستان قیته قوریلیشی اوچون آمریکا نینگ خاص تیکشیرووچی اداره‌سی یا-ده سیگار نینگ اعلام قیلیشیچه، سیلاولر کمیسیونی نینگ سابق رئیسی احمدیوسف نورستانی آمریکا ده بیر محکمه آرقه‌لی عمومی بودجه‌دن اوغیرلش گه عیبله‌نیب، ۶ آی اوی حبسی گه محکوم بولگن. جناب نورستانی اوچ ییل هم نظارت آستیده بوله‌دی.
جناب نورستانی اوتگن میلادی ییل کالیفرنیا نینگ جنوبی منطقه‌سیده‌گی بیر محکمه‌ده، ۲۰۱۵- ییل جولای آیی‌دن ۲۰۱۸- ییل نینگ دسامبر آیی گچه سفرلری و یشش ییرلری توغریسیده یلغان ایتگنی و ناقانونی شکلده آمریکا دولتی نینگ اجتماعی بودجه‌سیدن ۱۰۰ مینگ دالر قولگه کیلتیرگنی نی اعتراف قیلگن ایدی.
گزارشلر اساسیده، جناب نورستانی ۲۰۱۹- میلادی ییل نینگ سونگی پیت‌لریده کالیفرنیا نینگ جنوبی منطقه‌سیده‌گی بیر محکمه‌ده جرم نی قبول قیلیب و ۲۰۲۰- میلادی ییل ۹- مارچ گه اونینگ توغریسیده بویروغ صادر ایتیلیشی گه قرار قیلینگن ایدی. بیراق بویروغ صادر ایتیلیشی آرتده قالدیریلدی. بونده‌ی جرم‌لرگه یوقاری جزا ۱۰ ییل حبس و ۲۵۰ مینگ دالرنی نقدی جریمه توله‌ش دیر.
جناب نورستانی میلادی ۲۰۱۵- ییل ده دولتی مالی یاردم قولگه کیلتیریش اوچون اجتماعی بودجه اداره‌سیگه درخواست بیرگنی نی اعتراف قیلگن ایدی.
جناب نورستانی نینگ اعترافی اساسیده، او آمریکا اجتماعی رفاه اداره‌سیده سفرلری و یشش ییرلری حقیده یلغان ایتگن. نورستانی ناقانونی شکلده مذکور اداره دن ۲۷ مینگ دالر قولگه کیلتیرگن و شونینگدیک ۷۳ مینگ دن آرتیق دالر داروله‌نیش خرجتی بولگن.
احمد یوسف نورستانی میلادی ۲۰۱۴- ییل ده افغانستان سیلاولر ایرکین کمیسیونی نینگ ریاستی نی قولگه آلدی. او سیلاوده کوپ جنجل‌لر یوزبیرگنی باعث خبرتوزه‌توچی سیمالردن بیری گه اوزگردی.
جناب نورستانی اوتگن قویاش ییل نینگ ثور آیی ده افغانستان ده آغیر جرم‌لرگه قرشی کوره‌ش محکمه‌سی آرقه‌لی ۱۳ آی حبس و بیر میلیون افغانی توله‌ش گه محکوم بولگن ایدی، بیراق او حبس قیلینمه‌دی.
