بوگون «شنبه» کابل‌ده قیشلاقلرنی رواجلنتیریش وزیرلیگی بیلن قیشلاقلرنی رواجلنتیریش کینگش‌لر نماینده‌لری و خصوصی شرکت‌لر آره‌سیده 45 رواجلنتیریش پروژه شرطنامه‌سی امضالندی. قیشلاقلرنی رواجلنتیریش وزیرلیگی مسؤول‌لری‌نینگ ایتیشیچه، اوشبو 45 پروژه کوپریک، سوو توغانلری، سوو ییتکزیش کانال‌لر، استنادی دیوارلر و مکتب‌لرنی اطرافیده دیوارلر قوریلیشی‌دن عبارت.
اوشبو شرطنامه‌لرگه قول قوییش چاغیده قیشلاقلرنی رواجلنتیریش وزیری نصیراحمد درانی‌نینگ ایتیشیچه، مذکور 45 پروژه 378.9 میلیون افغانی خرجت کوتره‌دی و بو پروژه‌لردن 41 ته‌سی مالیه وزیرلیگی، 2 ته‌سی هند و باشقه 2 ته‌سی قزاقستان تامانیدن عمل‌گه آشیریله‌دی.
اونگه کوره، سوونی مدیریت قیلیش، ایکینچیلیک‌نی رواجلنتیریش و ایکینچی‌لرنینگ محصولاتی‌نی مرکزگه انتقال بیریش اوچون قولی‌لیک ایجاد ایتیش مذکور پروژه‌لرنی اساسی هدف‌لریدن بولگن.
جناب درانی‌نینگ ایتیشیچه، بو پروژه‌لر بدخشان، بادغیس، بغلان، بلخ، غور، هرات، قندهار،کنر، خوست، قندز، ننگرهار، پکتیا، سمنگان، سرپل، زابل، کاپیسا، میدان‌وردک و دایکندی ولایت‌لریده عمل‌گه آشیریله‌دی.
قیشلاقلرنی رواجلنتیریش وزیرلیگی مسؤول‌لری‌نینگ ایتیشیچه، بو پروژه‌لر ایش‌گه باشله‌گنده، مذکور ولایت‌لرنینگ یشاوچیلری اوچون 19 مینگ و 330 کون ایش زمینه‌سی یره‌تیله‌دی و 132 مینگ و 487 کیشی بو پروژه‌لردن فایده‌لنیشی ممکن.
