استانبول‌ده داعش تروریستی هجومی‌دن نیچه ساعت اوتگنی‌دن کیین، ترکیه‌ده باشقه بیر هجوم یوزبیردی.
اوشبو پارتلش هجوم بوگون (پنج‌شنبه) ایرته‌لب، ترکیه جنوب شرقی‌ده پولیس قرارگاه‌سی برابریده یوزبیردی.
الجزیره گزارشی اساسیده، مذکور واقعه‌ده حاضرگچه بیش کیشی هلاک بولگن و باشقه اون‌لرچه کیشی یره‌لنگن. یره‌لنگن‌لر رقمی کوپلیگی باعث، اوشبو واقعه‌ده هلاک بولگن‌لر سانی کوپه‌ییشی ممکن.
کردستان ایشچی‌لر حزبی (پی‌کی‌کی) سینار شهری پولیس قرارگاه‌سی اوستی‌گه اویوشتیریلگن هجوم مسؤولیتی‌نی بوینیگه آلگن.
تُرک کونده‌لیگی «حریت» گزارشی‌گه کوره، اوشبو هجوم مقصدی، سینار شهری پولیس قرارگاه‌سی ایکن و هجومچی‌لر پارتلاوچی ماده دن توله بولگن موترنی پولیس اداره بناسی‌گه اورگنی‌دن کیین، راکتی هجوم‌لر و آغیر قورال‌لر بیلن توقنه‌شووگه باشله‌گن.
شونینگ‌دیک، هابر محلی میدیانینگ یازیشیچه، هجومچی‌لر و امنیتی کوچلر اورته‌سیده یوزبیرگن توقنه‌شووده، پی‌کی‌کی اعضالریدن 8 ته‌سی هلاک بولگن.
ایرکین طلب، قورال‌لی، چپ‌گرا گروهی و کُردستان ایشچی‌لر حربی، میلادی 1984- ییل‌دن بویان، ترکیه مرکزی دولتی بیلن قتیق شکلده توقنه‌شیب کیلماقده. اوشبو گروه ترکیه سابق و حاضرگی دولت‌لری‌نی کُردلر حقی‌نی نقض قیلگن‌لیک‌که عیب‌له‌یدی.
گزارش‌لر اساسیده، پی‌کی‌کی و ترکیه دولتی ایکاوی کوپینچه پیت‌لرده بشر حقلری‌نی بیری- بیری‌گه قرشی اوروش‌ده نقض قیلگن. ایتیلیشیچه، میلادی 90- دهه اداغیده، کوپینچه‌سی تینچ اهالی بولگن 45 مینگ کیشی، اوشه زمان ترکیه دولتی یا پی‌کی‌کی حزبی عملیات‌لریده هلاک بولگن.
