کابل پولیس رسمی‌لری، بوگون (دوشنبه) ایرتلب ساعت 8 اطرافی‌ده کابل شهری‌نینگ توقیزینچی ناحیه‌سی‌گه قره‌شلی هوا شناس‌لیک خیابانی‌ده یوز بیرگن خودکش هجوم عاقبتی‌ده بیر کیشی قربان بولیب، باشقه 13 انسان تَن جراحتی آلگن لیگی‌نی ایتگن‌لر.
کابل پولیس قوماندانی عبدالرحمان رحمی‌نینگ سوزلریگه کوره، خودکش هجومچی پارتلاوچی ماده‌گه تولدیریلگن سراچه تیپلی موترنی تنیچ اهالی‌گه توله بولگن منطقه‌ده پارتلب یوبارگن.
جناب رحیمی، واقعه یوز بیرگن محل‌ده دولت‌گه قره‌شلی هیچ بیر بنا بولمه‌گن و شونینگ‌دیک هجوم‌دن نیت دولت‌نینگ بیرار ملازمینی نشانگه آلیش هم بولمه‌گن دیگن. عین حالده، وزیر اکبرخان ساغلیق‌نی سقلش عاجل بولیمی‌نینگ مسؤولی غلام‌نبی نینگ ایتیشیچه، پارتلش‌ده تَن جراحتی آلگن 13 کیشی اوشبو شفاخانه‌گه آلیب کیلینگن. جناب غلام نبی یره‌لنگن‌لردن سکیزته‌سی‌نینگ ساغلیق احوالی یامان دیگن.
باشقه تاماندن پارتلش یقینی‌ده جایلشگن عبدالله ابن مسعود مسجدی‌نینگ امامی عبدالرب‌گه کوره، اوشبو حادثه‌ده مذکور مسجدنینگ مدرسه‌نینگ 50 نفر اوقوچی‌سی آغیر و یینگیل یره‌لگن.
شوکبی عینی گواه‌لر پارتلش کوچلی بولگن‌لیگینی تیل‌گه آلیب، واقعه‌دن سونگ ملی کوچلر هواگه قره‌ته اوق اوزگن‌لر.
محل یشاووچی‌لریدن بیری احمد فواد، هجومچی‌نینگ اصلی نیتی ترکیه‌لیک حربی‌لر همده پیلوت‌لرنی نشانگه آلیش بولگن دیگن.
واقعه مسؤولیتی‌نی اوز ذمه‌سی‌گه آلگن قورال‌لی طالب‌لرنینگ سوزلاوچی‌سی ذبیح‌الله مجاهد هجوم‌دن نیت خلق ارا کوچلری‌نی نشانگه آلیش بولگن دیگن. مجاهد، واقعه‌ده خلق ارا کوچلریگه تلفات ییتکزیلگن‌لیگینی ادعا قیلگن.
