سوریه ایچکی اوروش‌لریگه حل یول تاپیش اوچون بوگون اتریش‌نینگ وین شهریده خلق ارا مذاکره اوتکزیلدی. بو بیرینچی مرته ایران و سعودی عربستان دیپلومات‌لری سوریه بحرانی حل ایتیلیشی اوچون مذاکره اوتکزه دیلر.
عین حالده، ایتیلیشیچه، سوریه دولت نماینده‌سی و مخالف گروه‌لردن هیچ بیر نماینده اشتراک قیلمه‌گن، اما مذکور ییغین‌ده دنیا و منطقه قدرت‌لری‌نینگ قتنه‌شیشی سوریه ایچکی اوروشی‌گه پایان بیریش اوچون خلق ارا سعی و حرکت‌لرنی کورسته‌دی.
امریکه، روسیه، ترکیه، سعودی عربستان و ایران تشقی ایشلر وزیرلری‌نینگ مذکور ییغین‌ده اشتراک قیلیشی سوریه بحرانی حل ایتیلیشی اوچون ایجابی تاثیری بار. شونینگ‌دیک بو اولتیریش‌ده بریتانیا، مصر، آلمان، فرانسه، لبنان، قطر و عمان دولت‌لری نماینده‌سی اشتراک قیلگن.
بوندن آلدین هم سوریه ایچکی اوروش‌لری باره‌سیده مذاکره اوتکزیلگن، اما بو بیرینچی مرته ایران نماینده‌سی بو قبیل ییغین‌ده قتنشه‌دی.
امریکه تشقی ایشلر وزیری جان کری اوشبو مذاکره باشلنمس‌دن آلدین عاموی اخبارات واسطه‌لریگه سوریه بحرانی حل ایتیلیشی اوچون امیدوارلیک بیلدیرگن. شوکبی بیرلشگن ملتلر تشکیلاتی‌نینگ باش کاتبی بانکی مون مذکور ییغین قتنه‌شوچی‌لریدن مساله اوچون صادق بولیش‌لرینی سوره‌گن.
روسیه یانی‌ده ایران سوریه حکومتی‌نی حمایت قیله‌دیگن‌لردن حسابلنه‌دی و سعودی عربستان ایسه سوریه‌نینگ عملده‌گی حکومتی‌نینگ مخالف‌لریدن. سوریه منازعه‌سی 2011- ییلده دموکراسی تیزیمی‌نی حمایت قیلیب اعتراض یول قوییلیشی بیلن باشلنگن ایدی و اعتراضچی‌لر حکومت تامانیدن تهدید ایتیلیشی بو مملکت‌نی ایچکی اوروش‌لرگه دوچار قیلدی. بیرلشگن ملتلر تشکیلاتی نینگ حساباتی‌ده بو مملکت‌نینگ ایچکی اوروشلریده هنوزگچه 250 مینگ انسان قربان بولگن.
