نورستان ولایتینینگ کانلری ناقانونی صورتده زورهوان کیشیلر تامانیدن ایشلب چیقاریلیب و تشقی مملکتلرگه کم بها بیلن قاچاق بولهدی.
نورستان یشاوچیلرینینگ ایتیشیچه، اوشبو ولایت میلیونلرچه دالر ارزشی بولگن قیمت بها تاش کانلریدن توله بولگن، بیراق بو کانلر زورهوان کیشیلر تامانیدن ناقانونی صورتده ایشلب چیقاریلیب و تشقی مملکتلرگه آلیب کیتیلهدی.
مذکور ولایت یشاوچیلریدن بیری فدامحمدنینگ سلاموطندارگه ایتیشیچه، حاضر اوشبو ولایتده بیرقطار کیشیلر قیمت بها تاشلر جملهدن بیروج (تورمالین) زمرد، لعل، کوک یاقوت، لاجورد، سریغ یاقوت، گارنیت، فلورایت و باشقه قیمت بها تاشلرنی ایشلب چیقارماقده. اونگه کوره، قیمت بها تاشلرنی ساتیش و ایشلب چیقاریشی خصوصیده 25 ییللیک تجربهسی بار. اولر بیر کیلوگرام بیروجنی 80 الی 300 مینگ افغانی ساتهدیلر، دیمک اونی نیچه گرامی 90 مینگدن آرتیق بولهدی.
اوشبو تاش بهاسی شونچه فرقلی بولگن کیم، پنجشیر و بدخشان ولایتلریده هر بیر کیلوگرامی 15 الی 30 مینگ دالر ساتیلهدی.
فدامحمدنینگ ایتیشیچه، نورستان دماوی منطقهسیده 81 کان موجود و اولر بیر آی ایچیده هر بیر کاندن 4 الی 6 کیلو بیروج ایشلب چیقارهدی.
سلام وطندار تامانیدن ترقهتیلگن گزارشلرگه کوره، هر بیر کان ییلده اورته شکلده 300 مینگ الی بیر میلیون افغانی عاید قیلهدی.
نورستان یشاوچیلریدن بیرقطارینینگ ایتیشیچه، عادی ایشچیلر اوشبو کانلرده بیر آی ایشلهگنیدن کیین، پولگه تولیب مملکتنی ترک ایتهدی.
بیرقطارلر حکومتنی عیبلب ایتیشیچه، رسمیلر نورستان کانلری ناقانونی صورتده ایشلب چیقاریلیشیگه دقت قیلمهیدی. اولرنینگ ایتیشیچه، حکومت تینچلیگی بیرقطار رسمیلرنینگ مذکور ولایت کانلرینی ناقانونی صورتده ایشلب چیقارهدیگن زورهوان کیشیلر بیلن قولی بارلیگینی کورستهدی.
مذکور ولایت مندول تومنی یشاوچیلریدن بیری قدرتالله عطایینینگ سلاموطندارگه ایتیشیچه، اوشبو تومن پولیس پوستهسی بیش کیلومترلیگیدهگی کانلر ناقانونی صورتده ایشلب چیقاریلهدی، بیراق حاضرگچه اوشبو کوچلر هیچ نرسه دیمهگن.
عین حالده، مذکور ولایت پولیس قومندانلیگی امنیت آمری، پولیس پوستهسی یقینیده کانلر ناقانونی صورتده ایشلب چیقاریلیشینی رد ایتهدی، بیراق ایتیشیچه، اوشبو کانلردن بیرقطاری پولیس حاکم بولمهگن ناتینچ منطقهلرده بولگن.
ایتیلیشیچه، بوتون نورستان ولایتیده 800 دن آرتیق قیمت بها تاشلر کانی موجود.
رسمیلر، نارسمی کیشیلر تامانیدن نورستان کانلری ناقانونی صورتده ایشلب چیقاریلیشینی تأیید قیلیب ایتیشیچه، اوشبو کانلر دولتگه قرشی قوراللی عصیانچیلر اوچون اونملی دیر.
مذکور ولایت کانلر ریاستی باشلیغی عاشقالله همکار سلاموطندار بیلن اوتکزگن صحبتیده، اوشبو کانلرنی رویخطگه آلیب قانونی قیلیشلرینی ایتکن. بیراق حاضرگچه بو ایش خصوصیده یوتوققه ایریشمهگنلر. اونینگ ایتیشیچه، حاضرگچه مذکور ولایت کانلر ریاستیده 325 کاننی رویخطگه آلگنلر.
جناب همکارنینگ اورغولشیچه، اوشبو ریاست، کانلر ناقانونی صورتده ایشلب چیقاریلیشینی باشقرهآلمهیدی. اونگه کوره، رویخطگه آلینگن کانلر حکومت تامانیدن باشقریلگن صورتده، هر بیر آیده حکومت داراییسی بیش میلیون افغانی کوپهیتیریلیشی ممکن.
باشقه تاماندن، نورستان خلقینینگ پارلماندهگی سابق نمایندهسی حاجی دادمحمدنینگ ایتیشیچه، حکومت کانلرنی باشقریشگه قادر ایمس دیر. اونینگ کوپهیتیریشیچه، حاضر مذکور ولایت نورگرام تومنی بیش کیلومترلیگی تتین منطقهسیده 17 بیروج کانی ناقانونی صورتده ایشلب چیقاریلهدی و ایکی آی ایچیده 12.8 میلیون افغانی محل عاید قیلهدی. جناب دادمحمدگه کوره، بیر آی ایچیده اوشبو کانلر زمرد عایدی 1500 مینگ افغانیگه ییتیشهدی.
شونینگدیک بوندن آلدین، پارلمان نمایندهلری نورستان کانلر ناقانونی صورتده ایشلب چیقاریلیشی خصوصیده خواطر بیلدیرگن ایدی. نورستان خلقی پارلماندهگی نمایندهسی پروین نورستانی، اوشبو موضوع خصوصیده خواطر بیلدیریب ایتیشیچه، ایشلب چیقاریلگن نرسهلر تشقی مملکتلر اینیقسه پاکستانگه ناقانونی صورتده قاچاق بولهدی.
