د بلخ ولایت د څارنوالۍ مسوولین، په دغه ولایت کې د تېر کال په پرتله د طلاق او ښځو پر وړاندې د تاوتریخوالي په شمېرو کې له زیاتوالي خبر ورکوي.
په یاد ولایت کې د ښځو پر وړاندې د تاوتریخوالي ځانګړې څارنوالۍ د شمېرو لهمخې، د سږکال له پېل راهیسې تر اوسه ۱۲۵ د ښځو پر وړاندې د تاوتریخوالي بېلابېلې دوسيې ثبت شوې دي، چې په دغو کې ۷۰ مورده د طلاق دوسیې دي.
د بلخ یوې څارنوالې فوزيې حمیدي سلاموطندار ته وویل، چې دوی په تېر کال کې یوازې د ښځو پر وړاندې د تاوتریخوالي ۷۲ دوسیې ثبت کړې دي، خو پر خبره يې دغه شمېره سږکال دوه برابره زیاته شوې ده.
له بل لوري په بلخ ولایت کې د ښځو چارو رییسې شهلا حدید سلاموطندار ته وویل، چې دوی په روان کال کې د کورني تاوتریخوالي ۳۴۵ دوسيې ثبت کړې دي، چې پر خبره يې دغه شمېره د تېر کال په پرتله زیاتوالی ښي.
حدید وايي، چې د دغو زیاتوالو له امله دوی اندېښمن دي.
همدارنګه ځينې هغه ښځې، چې د بلخ څارنوالۍ ته د خپلو ستونزو او دوسیو د حل په موخه ورغلي دي وايي، چې له دوی سره د میړنو بد او نامناسب سلوک دوی مجبور کړي، څو د جلا ژوند تصمیم ونیسي.
د بلخ ولایت د ښځو چارو مسوولین وايي، چې په دغه ولایت کې د معافیت فرهنګ شتون او د تاوتریخوالو عاملینو ته د سزا نه ورکول د دې لامل شوي، چې په یاد ولایت کې د ښځو پر وړاندې د تاوتریخوالو کچه زیاته شي.
