محمد مجتبی: د کرکټ بورډ له امله مې افغانستان پرېښود

د افغانستان د کرکټ ملي لوبډلې لوبغاړی محمد مجتبی کرکټ بورډ په فساد تورنوي، وايي، چې د دې ادارې د مشرانو له امله یې افغانستان پرېښود.

محمد مجتبی له دې مخکې په ملي لوبډلې، ۱۹ کلنو او د کرکټ په ملي الف لوبډلې کې لوبېدلی، چې او سمهال کاناډا ته کډه شوی دی.

نوموړي له کاناډا د ټیلیفون پر کرښه سلام وطندار سره په خبرو کې د کرکټ بورډ له ادارې شکایت وکړ او دغه اداره یې د لوبغاړیو د لوبولو په برخه کې په ناسمې پالیسۍ تورنه او زیاته کړه، چې کرکټ بورډ ورته خنډونه جوړول.

مجتبی وايي، چې د کورنۍ له مخالفت سره ـ سره یې د کرکټ سره د مینې له کبله د هېواد له پاره لوبې وکړې.

ده وویل، د افغانستان د کرکټ او بریاوو له پاره یې د افغانستان په امریکايي پوهنتون کې درسي بهیر ټکنی شو؛ خو دا ټولې هلې ځلې یې د کرکټ بورډ چیرمین نسیم الله دانش، اجرایوي مشر شفیق الله ستانکزي او روزونکي رییس احمدزي په اوبو لاهو کړې.

هغه وویل، د کرکټ بورډ په اداره کې خپلوي، ملګرتوب او واسطې ته لومړیتوب ورکول کېږي او زیاتوي، چې په بهرنیو سفرونو کې ډېر مسایل د نړیوال کرکټ د اصولو خلاف ترسره کېدل؛ خو

نوموړي هر ځلې په دې ټولو موضوع ګانو سترګې پټې کړي دي.

مجتبی کرکټ بورډ تورنوي، چې د زمبابوی خلاف په هندوستان کې له لوبو وروسته د مخکې تګ په ځای د "سنټرل کنټرکټ" د ختمېدو سزا ورکړل شوې ده.

دی وايي، که لوبغاړی د ظلم خلاف غږ پورته او یا خپل حق وغواړي؛ نو د ده او یو شمېرو نور لوبغاړیو په څېر برخلیک سره مخامخېږي، چې زیاتره لوبغاړي له همدې وجې چپه خوله دي.

نوموړی اوس د کاناډا په یو معتبر کرکټ لیګ کې لوبیږي.

مجتبی وویل، هر څوک ورته درناوی لري؛ خو د افغانستان له پاره د لوبېدو په اندازه خوند نه لري.

په ورته وخت کې د کرکټ بورډ عمومي مرستیال عزیزالله فضلي د مجتبی له خوا لګول شوي تورونه رد کړل او ویې ویل، د دې له پاره دغه ‌ډول تورونه لګوي، چې د پنا اخیستلو کېس قوي کړي.

فضلي وايي، چې مجتبی د څه وخت له پاره له کرکټ لوبو لرې و، ښايي په ځان یې باور راکم شوی وي؛ له همدې امله یې افغانستان پرېښود.

عزیزالله فضلي زیاته کړه، چې اوسنۍ اداره د پخوانیو ادارو په څېر نه ده. هر لوبغاړی کولی شي، د خپل حق غوښتولو له پاره اجرایوي کمېټې ته مراجعه وکړي.

دغه راز رییس احمدزي بیا د مجتبی له خوا لګول شوي تورونه بې بنسټه وبلل او مجتبی یې بې صبره او په ځان بې باوره لوبغاړی یاد کړ.

د نوموړي پر وینا، مجتبی یې روان کال د جاوید احمدي، ناصرجمال، حشمت شهیدي، شرف الدین اشرف او افسرځاځي په څېر د مشهورو لوبغاړیو په ۳۳ کسیزه پرمختیایي کرکټ لوبډله کې اخیستي و.

دی وايي، چې دغه ۳۳ کسیزه لوبډله د کرکټ راتلونکي و؛ خو نوموړي د نورو لوبغاړیو په څېر تنګسه تېره نه کړه او له هېواد نه بهر ولاړ.

احمدزی وايي، هر لوبغاړی مخکې له دې چې هېواد پرېږدي؛ یو ځل دې د خپل حق له پاره غږ پورته کړي؛ غږ یې په حوصله اورېدل کېږي.

د راپورنو پر بنسټ له دې مخکې هم په دې وروستیو کلونو کې عزت الله دولتزی، امیر منګل، داود احمدزی، ایوب ماروف خېل، جاوید احمدزی او د محب الله اوریاخېل په څېر لوبغاړي د بېلابېلو معلومو او نامعلومو دلایلو له کبله بهرنیو هېوادونو ته لاړل او هغوی د هېواد د پرېښودو لامل د کرکټ بورډ اداره بللې وه.