د ښځو او ماشومانو د ځورونې مخنیوي قانون مسوده د ولسي جرګې د ښځو او مدني ټولنو د چارو کمېسیون له خوا وړاندیز شوې وه، چې د دې جرګې له تایید وروسته پرې کار پیل شو.
ولسي جرګې نن ورځ (چهارشنبه) د دې جرګې په عمومي غونډه کې د ښځو او ماشومانو د ځورونې او هغوی ته د زیان رسولو په اړه د وکیلانو له خوا د قانون جوړه شوې مسوده په ۳ څپرکیو او ۲۹ مادو کې غونډې ته وړاندې کړه.
د قانون دا مسوده د ولسي جرګې په اړوندو کاري کمېسیونونو کې له څو میاشتو بحثونو او د وکیلانو د نظرونو وروسته د ولسي جرګې رییس عبدالروف ابراهیمي رایې راچونې ته وړاندې کړه، چې د رایو په غوڅ اکثریت تصویب شوه.
خو د ولسي جرګې د ښځو او مدني ټولنو د کمېسیون مشرې فوزیې کوفې وویل، چې د دې قانون په مسوده کې د ښځو او ماشومانو د ځورونې او هغوی ته د زیان رسولو د مخنیوي په موخه د نورو تدبیرونو ترڅنګ سرغړونکو ته بند او نقدي جریمه هم په پام کې نیول شوي دي.
فوزیه کوفي وایي، د قانون په دې طرحه کې د ښځو او ماشومانو د وړو ځورونو سزا له ۵ تر۱۰زرو افغانیو نقدي جریمه په پام کې نیول شوې، چې محکمه به یې ورته ټاکي.
نوموړې وویل، د وهلو، ټکولو او د جسمي زیان په مقابل کې سرغړونکي ته د بند سزا ورکول کېږي.
دغه راز د ولسي جرګې د ښځو اومدني ټولنو د کمېسیون غړې تورپیکۍ پتمن وویل، چې د قانون د دې مسودې څخه یې موخه په هېواد کې د ښځو او ماشومانو پر وړاندې د تاوتریخوالي او ځورونې مخنیوی او د زیانمن شوي ماشوم او مېرمن ملاتړ دی.
د یادونې ده، چې تر دې مخکې د عدلیې وزارت له خوا هم د ښځو او ماشومانو د ځورونې د مخنیوي په موخه یوه مقرره جوړه شوې وه، چې د وزیرانو شورا له تصویب وروسته په رسمي جریده کې هم خپره شوې وه.