د افغانستان د کډوالو او راستنېدونکو چارو وزارت چارواکي وایي، چې پاکستان باید د کډوالۍ مسله له سیاست څخه وباسي او په هغه هېواد کې افغان ګډوالو ته د استوګنې زمینه برابره کړي.
د دغه وزارت مطبوعاتي سلا کار حفیظ احمد میاخېل وویل، چې د پاکستاني چارواکو سره د افغان کډوالو پر اېستلو خبرې نه دې شوي، بلکې د کډوالو استوګنې او اسانتیاوو برابرولو په اړه بحثونه شوي دي.
د راپورونو له مخې پاکستان وايي، چې یو نیم میلیون افغان کډوال به له پاکستان څخه وباسي، خو د افغانستان د کډوالو چارو وزارت مطبوعاتي سلا کار حفیظ په دې اړه بې خبرې څرګنده کړه.
میاخېل زیاتوي، چې درې میاشتې وړاندې کابل ته د پاکستان حکومتي پلاوي په سفر کې له افغان حکومت سره دوه مهم هوکړه لیکونه لاسلیک کړل.
لومړی لاسلیک شوی هوکړه لیک په پاکستان کې" د ۱،۵ میلیونو افغان کډوالو د مېشته کېدو قانوني موده چې په ۲۰۱۵ کال وروستیو کې پای ته رسیږي او تر ۲۰۱۷ ز کال پورې به تمدید کړي.
نوموړي له سلام وطندار سره په خبرو کې زیاته کړه، چې د پاکستان د قبایلو چارو وزیر د افغان کډوالو د مېشته کېدو قانوني نېټې غځېدو موضوع د پاکستان کابینې ته وړاندې کړې ده، چې د پرېکړې سره سم به دغه کار رسمي پيل شي.
ده وویل، چې دویمه هوکړه یې د یو میلیون څخه د زیاتو نا قانونه افغان کډوالو د قانوني کېدو په اړه لاسلیک کړی، چې پر وینایې د دې کار د پيل له پاره افغان حکومت سل کسیز پلاوی چمتوکړی ترڅو دا بهیر له نږدې وڅاري.
بل خوا په کابل د پاکستان سفارت وایي، چې درې میلیونو پورې افغان کډوال پاکستان کې ژوند کوي او د دې شمېر څخه شاوخوا نیمايي د استوګنې قانوني اسناد لري.
کابل کې د پاکستان سفیر اختر منیر سلام وطندار سره د مرکې پر مهال وویل، چې پاکستان اوس له ګڼو ستونزو سره مخ دی او غواړي چې ټول افغان کډوال افغانستان ته ور ستانه کړي.
منیر زیاته کړه، چې افغانستان ته د ګډوالو راستنېدل د دواړو هېوادونو په ګټه دي.
سفیر وویل، پاکستان کې اوسمهال د افغان کډوالو پنځه سوه زره ماشومان ښوونځيو ته ځي او ترڅنګ یې دوی په نورو برخو کې هم د ژوند اسانتیاوې ورته برابرې کړې دي.
د راپورونو پربنسټ اوس مهال په ایران کې هم یو میلیون افغان کډوال د استوګنې قانوني اسناد لري او شاوخوا یومیلیون نور یې د استوګنې قانوني اسناد نه لري.
د افغانستان د کډوالو چارو وزیر څه موده مخکې ویلي و، چې له ګاونډیو هېوادونو څخه راستنېدونکو ګډوالو ته به په خپل ولایت کې یو نمره ځمکه ورکول کیږي.
