افغانستان مخدره ماده گه قرشی کوره‌ش وزیرلیگی‌نینگ ینگی تیکشیروولریگه کوره، 1397- ییل، مملکت‌ده کوکنار ایکینی 20% کمه‌یگن.
بوگون «دوشنبه» کابل‌ده خبری بیر ییغینده نطق سوزله‌گن مخدره ماده گه قرشی کوره‌ش وزیری سلامت عظیمی‌نینگ ایتیشیچه، اوتگن ییل‌گه نسبتن جاری ییل‌ده مخدره ماده ایشلب چیقاریش هم کم بولگن.
خانم عظیمی گه کوره، اوتگن ییل‌گه نسبتن مخدره ماده ایشلب چیقاریش 29% کمه‌یگن. مخدره ماده گه قرشی کوره‌ش وزیری‌نینگ ایتیشیچه، اوتگن ییل 328 مینگ هکتار ییرگه کوکنار ایکیلگن ایکن و بو رقم جاری ییل‌ده 263 مینگ هکتارگه ییتیشگن.
ایچکی ایشلر وزیرلیگی‌نی مخدره ماده گه قرشی کوره‌ش اورین باسری عبدالجلیل بختیارنینگ ایتیشیچه، جاری ییل‌ده مملکت بویلب مخدره ماده ایشلب چیقاریلیشی و کوکنار ایکینی نابود ایتیلیشی اوچون 3074 عملیات یولگه قوییلگن. جناب بختیارنینگ ایتیشیچه، 1397- ییل‌ده مخدره ماده ایشلب چیقاریش و کوکنار ایکینی گه عیب‌لنگن 3527 کیشی قولگه آلینگن و شونینگدیک، 30 مخدره ماده لابراتواری بوزیلگن.
شونینگدیک، اوشبو وزیرلیک‌نی معلوماتی گه کوره، اوتگن ییل گه نسبتن تریاک حاصلی بیر هکتار ییرده 27.3 کیلوگرام دن 24.4 کیلوگرام گه کمه‌یگن و بو رقم 11% آزه‌یگنینی کورسته‌دی.
اوشبو معلومات ایکینزارلرده تریاک ایشلب چیقاریش ارزشی کمه‌یگنینی بیلگی‌لنتیره‌دی. مخدره ماده گه قرشی کوره‌ش وزیرلیگی‌نینگ بیاناتی اساسیده، 1396- ییل‌ده ایکینزارلردن تریاک ایشلب چیقاریش ارزشی 1.4 بیلیون دالر و 1397- ییل‌ده 0.6 بیلیون دالر بولگن و بو رقم ایسه 56% کمه‌یگنینی بیلدیره‌دی.
