سونگی کونلر اجتماعی ترماقلرده «12 لعنتلی عیال» آتلی کتاب قولمه قول بولدی. بو کتاب جدی عکسالعمللرگه هم سبب بولدی؛ ینگیلیکده ایسه، «12 لعنتلی عیال» کتابی گه عکسالعمل «24 لعنتلی ایرکک» آتیده طنزی بیر رویخط اجتماعی ترماقلرده یایینلندی.
12 لعنتلی عیال کتاب موضوعی عیاللرگه اهانت سنلهدی و کتاب یازووچیسی «لعنتلی عیاللرنی» دستهبندلیک قیلیش اوچون سعی و حرکت قیلگن. اورنک شکلده عنوانلردن بیری، چپلک کییگن عیاللرنی لعنتلنگنلرگه شامل قیلگن.
کابل بازاریده بو کتاب ساتیلیب و ترقهتیلیشی افغانستانده کتاب باستیریلیب چیقیشی و نشریاتی یمانلیگینی کورستهدی. مدنیت و معلومات وزیرلیگینینگ مسؤوللری، بازارلرده عیاللرگه قرشی زورهوانلیک موضوعی و اهانتلی کتابلر موجودلیگینی تصدیقلب ایتیشیچه، کتاب بازارینی تیکشیریب چیقیش کمیسیون تعیین ایتیلگن، بیراق بو کمیسیون امکانیت کملیگی باعث، مملکتده کتاب بازارینی یخشی بیر شکلده نظارت قیله آلمهیدی.
سلاموطندارگه صحبت بیرگن مدنیت و معلومات وزیرلیگینی نشرات مصلحتچیسی سیدجعفر راستیننینگ ایتیشیچه، کتابنی تیکشیریش کمیسیونی، کتابلر باستیریلیب و ترقهتیلگنیدن سونگ، تیکشیرهدی. جناب راستین، بازارده عیاللرگه قرشی زورهوانلیک موضوعی و اهانتلی کتابلر موجودلیگینی تصدیقلیدی، بیراق ایتیشیچه، باستیریلیب و ترقهتیلگن کتابلرنینگ برچهسینی تیکشیریب چیقیش بو کمیسیوننینگ کوچیدن یوقاری دیر.
جناب راستین گه کوره، کتابلرنی تیکشیریش کمیسیونی، هر آی نیچه مرته باشکینتده بولگن کتاب بازارلرینی تیکشیرهدی و قانون گه قرشی موضوعی بولگن کتابلرنی بازاردن توپلب و قیته باستیریلیب چیقیشی گه توسیق بولهدی.
بیراق، کابلده کتاب ناشرلریدن بیری طارق قاسمینینگ ایتیشیچه، مدنیت و معلوما وزیرلیگی کتابلر باستیریلیب چیقیشی و ترقهتیلیشینی هیچ قندهی نظارت قیلمهیدی. جناب قاسمی گه کوره، افغانستان گه آلیب کیلینهدیگن کتابلر هم نظارت قیلینمهیدی، بیراق مملکتدن تشقری کتاب یوباریلگنده، مدنیت و معلومات وزیرلیگیده زمان آلهدی.
قاسمینینگ ایتیشیچه، نفرت و زورهوانلیکنی رواجلنتیرهدیگن کتابلر، کتاب بازاریده یخشی ساتیلهدی و بو مملکت کیلهجگی اوچون خواطرلی دیر.
افغانستان قانونی باستیریلیب چیقیشیدن آلدین بولگن سانسورنی رسمیت گه تانیمهیدی و بیرقطار کیشیلر ایسه وضعیتدن فایدهلنیب نفرتلی و زورهوانلیک موضوعی بولگن کتابلرنی باستیریب و ترقتهدی.
