د کندوز ولایت شورا مرستیال له خپلو وسله والو کسانو سره د دې ولایت د روغتیا ریاست د قردادونو د داوطلبۍ یوې غونډې ته داخل شوی او له داوطلبانو نه یې د پيسو غوښته کړې ده.
د کندوز د روغتیا ځایناستی رییس عبدالمتین عاطفي وايي، دا پېښه داسې مهال وشوه، چې د دې ولایت د ولایتي شورا مرستیال توریالي کاکړ غوښتل چې خپل د کاکا زوی د معتادینو د ۵۰ بیستریز روغتون د خریدارۍ قرارداد د ګټلو په پار د داوطلبۍ بهیر ته په غیرقانوني ډول شامل کړي. خو کله چې د کاکړ دې غوښتنې ته د رد ځواب وویل شو؛ موضوع په لفظي شخړه واوښته او د ۲ زرو امریکايي ډالرو غوښتنه یې وکړه.
په دې غونډه کې د ولایت، مستوفیت، ولایتي شورا او له فساد سره د مبارزې ادارې استازیو ګډون لرلو. خو د کندوز د ولایتي شورا مرستیال د روغتیا د رییس ادعاو ردوي، وايي چې هغه له رسمیاتو و وروسته د داوطلبۍ مراسم پيل کړي وو، چې دا غیرقانوني کار دی.
کاکړ زیاتوي، چې د روغتیا رییس د داوطلبۍ حقوقي مسوولیت نه لري.
په شمال لویدیځ کې له فساد سره د مبارزې ادارې مسوول د کندوز د ولایتي شورا د مرستیال او د روغتیا ځایناستي رییس ترمنځ لفظي شخړه تاییدوي؛ خو فزیکي شخړه ردوي.
د کندوز د والي ویاند سیدمحمود دانش وايي، چې د روغتیا ریاست د دواطلبۍ په مراسمو کې د کندوز د ولایتي شورا د مرستیال او د روغتیا د ځایناستي رییس ترمنځ د شخړې حل له پاره د والي مرستیال حشمت الله عرض بیګي ورغلی؛ خو که موضوع حل نه شي؛ څانوالۍ ته معرفي شي.
خو پوښتنه دا ده، که چېرې د داوطلبۍ مراسم غیرقانوني وو؛ د ولایت، ولایتي شورا، مستوفیت او له فساد سره د مبارزې ادارې غړیو په کوم بنسټ په کې ګډون کړی و؟ دا هغه پوښتنه ده، چې له دې ټولو ګډونوالو سره له اړیکي نیولو وروسته بې ځوابه پاتې شوه.
