یوناما و بیرلشگن ملت‌لر تشکیلاتی‌نینگ انسان حقوقی ایشلری بوییچه دفتری‌نینگ ایتیشیچه، میلادی 2018- ییلده تینچ اهالی قربانلری‌نینگ رقمی یوقاری درجه گه ییتیشگن.
اوشبو گزارش اساسیده، میلادی 2018- ییل، افغانستانده 3804 تینچ‌اهالی هلاک ایتیلگن و بو جمله‌دن 927 ته‌سینی باله‌لر تشکیل بیره‌دی.
گزارش‌ده کوپه‌یتیریلیشچه، تینچ‌اهالی گه قرشی قربانلیک‌نی 63% دولت گه قرشی قوراللی عصیانچیلر تامانیدن کیریتیلگن و اوشبو 63% جمله‌سیدن 37% طالبان گروهی تامانیدن، 20% داعش گروهی تامانیدن و باشقه 6% ناتانیش گروهلر تامانیدن تینچ اهالی گه کیریتیلگن.
مذکور گزارش‌گه کوره، 2018- ییلده 10993 تینچ‌اهالی اولیب و یرهلنگنلر و بو جلمه‌دن 3704 کیشی هلاک ایتیلیب و باشقه 7189 کیشی یرهلنگنلر.
گزارش‌ده کوپه‌یتیریلیشیچه، 2017-ییلده قره‌گنده 2018- ییلده تینچ‌اهالی تلفاتی 11% کوپه‌یگن.
گزارش‌گه کوره، اوتگن ییلده خودکش هجوم‌لرنینگ کوپه‌یشی، حکومت‌گه طرفدار بولگن کوچلرنینگ عملیاتی و هوایی هجوم‌لر کوپه‌یشی تینچ‌اهالی تلفاتی‌نینگ رقمی‌نی یوقاری درجه گه ییتیشگنی‌گه سبب بولگن.
افغانستان بوییچه بیرلشگن ملت‌لر تشکیلاتی‌نی خاص نماینده‌سی تدامیچی یاماموتو نینگ ایتیشیچه، افغانستانده تینچ‌اهالی تلفاتی‌نینگ کوپه‌یشی خواطرلنترووچی دیر. او اوروش تامانلریدن تینچ‌اهالی تلفاتی‌گه توسیق بولیش اوچون دقت قیلیشی‌نی سوره‌گن.
یاماموتو گه کوره، اوتگن بیر دهه ده 32 مینگ تینچ‌اهالی افغانستانده هلاک ایتیلیب و باشقه کمیده 60 مینگ کیشی یره‌لنگن.
اونینگ کوپه‌یتیریشیچه، آتیشمه یکونلنیشی و افغانستان تینچلیگی توغریسیده حرکت قیلینیشی تینچ اهالی تلفاتی آلدی آلینیشی اوچون یخشی یول دیر.
بیرلشگن ملت‌لر تشکیلاتی‌نینگ انسان حقلری دفتری‌نی ییریک اعضاسی میشل بشلت نینگ ایتیشیچه، اوتگن ییلده باله‌لر تلفاتی کوپ بولگن و باله‌لردن کوپینچه‌سی تعلیمات و پزشکی امکانیت‌لردن محروم قالگنلر.
بشلت افغانستان اوروش تامانلریدن خلق ارا قانونلرگه حرمت قیلیب و تینچ اهالی حیاتی نی خوف گه برابر قیلمسلیکلرینی سوره‌گن.
یوناما گزارشی‌نینگ کوپه‌یتیریشیچه، اوتگن ییلده تینچ اهالی نینگ 42 فایزی تلفاتی خودکش هجوم‌لر و باشقه تورلی حادثه‌لر باعث بولگن و اولرنینگ نتیجه‌سیده 2809 تینچ اهالی ( 886 کیشی هلاک و 1923 کیشی یره‌دار) هلاک و یرلنگن.
شوتوغریده…
- یوناما: دشت‌ارچی هجومیده 36 تینچ اهالی هلاک بولگن
یوناما: میلادی 2017- ییلده 10 مینگ تینچ اهالی هلاک بولیب و یره‌لنگن
اوشبو گزارشلر اساسیده، اوتگن ییلده دولت گه قرشی قورالیلر 65 خودکش هجوم عمل گه اَشیرگنلر و اولردن 21 ته‌سی طالبلر و شونینگدیک باشقه 36 ته‌سی داعش گه نسبت بیریلگن. گزارش‌نینگ کوپه‌یتیریشیچه، طالبلرنینگ 2018- ییلده تینچ اهالی برابریده عمدی هجوم‌لری ایکی برابر کوپه‌یگن.
گزارش‌نینگ ایتیشیچه، 2018- ییلده دولت طرفدارلری آرقلی تینچ اهالی تلفاتی 24 فایز کوپه‌یگن و بولردن کوپینچه‌سی (1185 کیشی هلاک و 1427 کیشی یره‌دار) هوایی هجوم‌لر آرقلی یوزبیرگن و قربانیلرنینگ 3 دن 2 حصه‌سینی عیاللر و باله‌لر تشکیل بیره‌دی.
اوشبو گزارش اساسیده، اوتگن ییلده خلق ارا کوچلر هجومیده 406 تینچ اهالی هلاک و باشقه 268 کیشی تن جراحتی کوتارگن.
گزارش نینگ کوپه‌یتیریشیچه، 2018- ییلده باله‌لر تلفاتی 28 فایز (927 کیشی هلاک و 2135 کیشی یره‌دار) بولگن و شونینگدیک اوشبو ییلده عیاللر تلفاتی 10 فایز (350 کیشی هلاک و 802 کیشی یره‌دار) بولگن و اولردن کوپینچه‌سی دولت گه قرشی قورالیلرنینگ هجوم‌لری باعث یوزبیرگن.
گزارش گه کیلیشیچه، گرچند 2017- ییل گه قره‌گنده 2018- ییلده باله‌لر تلفاتی 3 فایز قویی کیلگن؛ بیراق 2018- ییل ده باله‌لر تلفاتی باشقه ییل لرگه نسبتن کوپ بولگن.
