د بریتانیا چاپ ګارډین ورځپاڼې په یوه تازه راپور کې لیکلي دي، که څه هم حامد کرزی له ۹ میاشتو راپه دې خوا د افغانستان ولسمشر نه دی، خو په دې هڅه کې دی، چې د دغه هېواد په سیاست کې خپل حضور بې رنګه ونه ښيي.
دغې ورځپاڼې د حامد کرزي اخوا دې خوا سیاسي هلې ځلې "د افغانستان د سیاسي نا امنۍ هڅې" په نامه یادې کړي دي.
ګارډین زیاتوي، چې د کرزي په دوره کې د هغه تند خوی د دې سبب شوی و، چې خپل یو شمېر نړیوال مرستندویان له لاسه ورکړي او اوس چې پوره بې کاره شوې دی؛ هڅه کوي، چې بیاځلي د افغانستان د سیاسي اوضاع واکدار شي.
په دغه راپور کې راغلي دي، چې د افغانستان د اوسني ولسمشر محمد اشرف غني د محبوبیت کمېدل، په ټاکنیزو مبارزو کې د کړو وعدو نه عملي کېدل او له پاکستان سره د سولې په اړه د خبرو اترو پیلول حامد کرزي ته دا موکه ورکړې، چې سیاسي ګټه ترې واخلي.
خو څه موده وړاندې حامد کرزي په یوه مرکه کې همدې ورځپاڼې ته ویلي وو، چې د پردې شا ته ولسمشر غني ته مشوره ورکوي او د ملي یو والي له حکومته ملاتړ کوي.
ګارډین ورځپاڼې د یو لویدیځ دیپلومات له خولې ویلي دي، چې کرزی له څو میاشتو راهیسې د ملي یو والي حکومت د کمزوري کولو او سقوط هڅه کوي.
د پخواني ولسمشر حامد کرزي ویاند او هغه ته نږدې شخص ايمل فېضي کارډين ورځپاڼې سره دا ګونګوسې رد کړي او زیاته کړې یې ده، چې د نړۍ بېلابېلو هېوادونو ته د حامد کرزي سفرونه د دغه هېواد د سياسي بې ثباتۍ له پاره نه بلکې د پخوانيو اړيکو پالل دي.
که څه هم حامد کرزي د خپل حکومت نه وروسته د ملي یو والي د حکومت په اړه کومه ځانګړې منتقدانه سیاسي موضوع نه لرله، خو د سیاسي چارو شنونکي یې بهرنیو هېوادونو لکه چین، روسیې او هند ته له نااعلان سفرونو داسې انګېري، چې دی د ملي یو والي حکومت پر وړاندې د نویو سیاسي فعالیتونو د پيلولو هڅه کوي.
