کینگش اعضاسی مخابراتی ترماقلر مالیاتی بویروغی‌نینگ رد قیلدی. جمهور رییس بو تقنینی بویروغنی کینگش نینگ یازگی تعطیلاتیگه برابر صادر ایتگن ایدی، اونگه قره‌گنده برچه مخابراتی شبکه‌لر 10 فایز مصرف قیله‌دیگن کارتلریدن مالیات تولشگه مجبور قیلگن ایدی.
کینگش اعضالریدن کوپیسی نینگ ایتیشیچه، مذکور بویروغ اولکه اساسی قانونی 79- ماده‌سیگه قرشی ایکن. اوشبو ماده‌ده کیلیشیچه، حکومت کینگش نینگ تعطیل بولگن پیتی‌ده «مالی و بودجه‌یی» نرسه‌لردن باشقه تقنینی بویروغ‌لر صادر قیله آله‌دی و اوشبو بویروغ ایسه کینگش تعطیلاتیدن کیینگی بیرینچی اولتیریشده بحث گه آلینیب، نماینده‌لر تامانیدن ایشانچ آوازینی آلمه‌گن صورتده ساقط بوله‌دی.
کینگش باشلیغی عبدالرؤوف ابراهیمی، مذکور بویروغ اساسی قانونگه قرشی ایکن و حکومت کینگش تامانیدن بو توغریده تصمیم آلینیشی اوچون، باید قانونی لایحه‌لرنی کینگش‌گه یوبارسین دیگن.
بوندن آلدین اولکه مخابرات و تکنولوژی وزیرلیگی عبدالرزاق وحیدی، بیر هفته‌ده 80 میلیون افغانی مخابراتی ترماقلردن دولت خزانه‌سیگه کیلگن ایکن‌لیگی‌نی بیلدیرگن ایدی.
اما جمهور رییس حقوقی مصلحت‌چیسی عبدالعلی محمدی نینگ سلام‌وطندارگه ایتیشیچه، دولت خزانه‌سیگه کیله‌دیگن 10 فایز مصرفی کارتلر «حق‌الخدمت» دیر نه مالیه بولسه. او بو بویروغنی دولت حقی دیب بیله‌دی.
عین حالده، مخابرات وزیرلیگی نینگ مسؤوللریگه کوره، مخابراتی خدماتلردن محصول آلیش یلغوز افغانستان‌ده ایمس. بل، دنیا اولکه‌لری اینیقسه قوشنی اولکه‌لرده، بو لایحه تطبیق بیریلماقده، بیراق اولکه یشاوچیلریدن کوپیسی مذکور پول سوء استفاده بولیب کیتیشی‌دن خواطر بیلدیره‌دیلر.
