د کندوز د پوهنې رییس نحبیبالرحمان ثاقب سلاموطندار ته وايي، دې ولایت کې یې د ۱۰۰ بابه ښوونځیو جوړولو چارې پیل کړي.
د هغه په وینا، د دغو سلو ښوونځیو له ډلې ۸۵ یې د اقرا پروګرام له لوري جوړېږي چې لګښت یې هم د نړۍوال بانک له بودیجې څخه ورکول کېږي او پاتې ښوونځي به هم د ۶۶ میلیونو افغانیو په لګښت د افغان دولت له بودیجې جوړ شي.
د ده په وینا، د نړۍوال بانک له لوري د جوړېدونکیو ښوونځیو ټول مراحل بشپړ شويدي.
د کندوز د کلیو پراختیا ریاست سرپرست انجنیر عزیزالرحمان واحدي وویل، زیاتره دغه ښوونځي د دې ولایت لېرې پرتو سیمو او ولسوالیو کې جوړېږي چې د یو کال په ترڅ کې به ګټې اخېستلو ته وسپارل شي.
ورته مطالب:
ناامنیو کندوزي زدهکوونکي «سهپارچو» ته اړ کړل
په کندوز کې ښوونکیو د معاشونو ځنډېدو په غبرګون ښوونځي تړلي
طالبانو په کندوز کې ۱۲ دیني مدرسې تړلې
د کندوز والي عبدالجبار نعیمي د دغو ښوونځیو جوړولو چارو پرانیستلو پرمهال وویل، تر راتلونکیو درېیوو میاشتو به هغو ۲۲ ښوونځيو ته ـ چې ځای نه لري ـ ځمکه بېله شي او ټولو ښوونځیو ته به امکانات برابر شي.
د هغه په وینا، لهدې وروسته به هېڅ شخص یا ډلې ته اجازه ور نهکړي چې له ښوونځیو د سنګر په توګه کار واخلي او باید د ښوونځیو ورانولو مخه ونیول شي.
د کندوز والي له هغو ځمکوالو مننه وکړه چې د ښوونځیو لهپاره يې ځمکې ځانګړې کړې او زیاته يې کړه چې دا خلک د تقدیر او ستایني وړ دي چې خپل معارف پياوړی کوي او د معارف د پياوړتیا لهپاره قربانۍ ورکوي.
دې سره د کندوز یو شمېر اوسېدونکي له ځايي ادارې غواړي چې د دغو ښوونځیو جوړولو له بهیره جدي نظارت وکړي چې د ښوونځیو ودانۍ په معیاري ډول جوړې او په ټاکلي وخت ګټې اخېستلو ته وسپارل شي.
کندوز کې د ۵۰۹ بابه ښوونځیو له ډلې ۱۵۰ ښوونځي ودانۍ نهلري او زدهکوونکي یې ازادې فضا کې تر خېمو لاندې درس وايي.
