افغان کرکټ بورډ نن (دوشنبه) د ختیځ زون په لغمان ولایت کې د یو معیاري کرکټ لوبغالي د جوړولو تړون لاسلیک کړ.
په همدې موخه د افغانستان د کرکټ بورډ په مرکزي دفتر کې د کرکټ بورډ چیرمین نسیم الله دانش او محمد شفیق ودانیز شرکت ترمنځ یو هوکړه لیک لاسلیک شو.
د افغانستان کرکټ بورډ چیرمین نسیم الله دانش رسنیو سره په خبرو کې وویل ، چې د لغمان کرکټ لوبغالی به په ۳۰ جریبه ځمکه کې په راتلونکو ۸ میاشتو کې جوړ او د لوبو له پاره به چمتو شي.
کرکټ بورډ وایي، چې د دغه لوبغالي ټول لګښت د افغانستان کرکټ بورډ له بودیجې ورکول کیږي، چې د دې لوبغالي په جوړولو سره به په دې ولایت کې د کرکټ لوبغاړو ستونزې حل شي.
د کرکټ بورډ عمومي مشر نسیم الله دانش زیاته کړه، چې دوی د هېواد په هر ولایت کی د کرکټ ودانیزو چارو ته ټټر وهي.
په همدې حال کې د محمد شفیق ودانیز شرکت مشر محمد شفیق په خبري غونډه کې وویل، چې د لغمان کرکټ لوبغالی به په معیارونو برابر یو لوبغالی جوړ کړي.
افغان کرکټ بورډ تېره میاشت د ننګرهار ولایت په مرکز جلال اباد ښار کې هم د کرکټ دویم لوبغالي جوړولو له پاره ځمکه ترلاسه کړه او هم یې په یو شمېر نورو ولایتونو کې د کرکټ لوبغالو د جوړولو تړونونه لاسلیک کړي دي.
لغمان ولایت د افغانستان په کورني کرکټ کې رغنده رول لري، چې یو شمېر لوبغاړي یې د هېواد په ملي کرکټ لوبډلو کې لوبېدلې دي خو په کور د ننه یې د لوبو له پاره منظم لوبغالې نه لاره.
