د افغانستان فوټبال فدراسيون د کروشیا هېواد فوټبال مشر پيتر سرګيټ يې د سلاوان سکلیزیچ پر ځای د افغانستان د فوټبال ملي ټيم مشر وټاکه.
د فوټبال فدراسيون د بهرنيو اړيکو مسول مصطفی ميرزاد سلام وطندار ته د يوې ټېلفوني اړيکې پر مهال وویل، چې د سرګیټ سره د افغانستان فوټبال ملي ټيم له خوا قرارداد تېره شپه نهايي شوه.
میرزاد وايي، چې پيټر سرګيټ له دې وړاندې د ګرجستان ملي ټيم او په بوند سليګای لیګ کې د جرمني ټيم مشر پاتې شوی دی.
د فوټبال نوی مشر ۴۹ کاله عمر لري او د اروپا د فوټبال اتحاديې( یوفا) څخه د لوبډلمشر سند هم لري.
پيتر سرګيټ فوټبال يې د المان په لیګ کې پېل کړ او په اف وي کالوو، پلوشینګين، شووینخایم، المرباخ، والدورف او والدوف فوټبال ټيمونو کې يې لوبې کړي دي.
په ۱۹۹۳ م ز کال کې، چې ۲۷ کلن وو د مصدوميت له وجې ونه شوی کولی، چې د لوبغاړي په صفت فوټبال ته ادامه ورکړي.
نوموړي د همغه وخت راهیسې د فوټبال لوبډلمشر په توګه په کار پېل وکړ.
هغه ته د فوټبال د معمار لقب هم ورکړل شوی دی، ځکه تر اوسه يې زیات لوبغاړي د نړۍ فوټبال ټيمونو له پاره روزلي دي.
سرګيټ درېیم لوبډلمشر دی، چې د تېر یوه کال په موده کې د افغانستان د فوټبال مشر په توګه ټاکل کيږي.
د افغانستان د فوټبال ټيم پخوانی مشر سلاوان سکلیزیچ ځکه د فوټبال فدراسيون له خوا لېری کړی شو، چې د افغانستان د فوټبال ټيم د روسيې په ۲۰۱۸ م ز کال د نړېوال جام په ابتدايي لوبو کې پرلپسې ماتې تجربه کړې.
د فوټبال فدراسيون د يوې خبرپاڼې په خپراوي سره د سکلیزیچ له کارونو د ستاينې ترڅنګ ویلي، چې د هغه حضور د افغانستان د فوټبال ملي ټيم د لوبډلمشر په توګه د لنډمهالې له پاره د هېواد په ګټه نه وو.
د یاد لوبډلمشر په وخت کې د افغانستان د فوټبال ملي ټيم ۸ لوبې وکړې، چې په دغو لوبو کې يې دوې وګټلې، يوه لوبه مساوي کړه او ۵ نورې يې و بايللې.
په پام کې ده، چې د افغانستان ملي ټيم د روسيې په ۲۰۱۸ م ز کال مقدماتي سياليو کې د نومبر په ۱۲ مه نېټه په تهران کې د کمبوج فوټبال ټيم پر وړاندې لوبه وکړي.
