افغانستان سابق جمهور رییسی حامد کرزی اداره‌سی اوچون علیحده اختصاص‌لشتیریلگن بودجه اوچون قرشیلیگی‌نی اعلان قیلدی. کرزی اداره‌سی تامانیدن اعلان ایتیلگن اعلامیه‌ده، او دولت تامانیدن هیچ قنده‌ی امتیاز بیریلیشی‌نی ایسته‌میدی.
اعلامیه‌ده یازیلیشیچه، سابق جمهور رییس اداره‌سی ملازملری‌نینگ فعالیتی اداره امور تامانیدن علمی ایتیله‌دی.
عین حالده، ایریم گزارش‌لرده افغانستان جمهور رییسی اشرف‌غنی، سابق جمهور رییس حامدکرزی اداری ایش‌لری اوچون مخصوص بودجه اجره‌تیلیشی اوچون فرمان صادر قیلگنی ایتیله‌دی.
جاری ییل ایکینچی آیده صادر بولگن مذکور فرمان بیشیچی آی‌نینگ ییتینچی تاریخی‌ده حامدکرزی تامانیدن جواب یازیلب اداره امورگه صادر بولگن.
مذکور فرمان جوابی‌ده یازیلیشیچه، سابق جمهور رییس‌نینگ اداره‌سی مخصوص بودجه اجره‌تیلیشی اوچون تشکیلات‌گه ایگه ایمس.
ملی بیرلیک حکومتی تاسیس ایتیلگن‌دن سونگ، دولت سابق جمهور رییس استقامت قیلیشی اوچون یشش بنا نظرده توتگن ایدی، اما مذکور بنا حامد کرزی تامانیدن دولت‌گه تاپشیریلدی. حاضر قصر سپیدار دیب اته‌لووچی اوشبو بنا ملی بیرلیک حکومتی اجراییه باشلیغی عبدالله عبدالله تامانیدن رسمی اداره صفتی‌ده ایش آلینه‌دی.
عین حالده، بوگون سنا مجلسی نینگ بعضی اعضالری حامد کرزی‌گه اساسی قانون‌گه موافق امتیاز بیریلیشی‌نی سوره‌گنلر. اولر جمهور رییس غنی‌نینگ فرمانی ناقانونی‌نی بولگن‌لیگی باره‌سیده تاکیدله گنلر.
سنا مجلسی‌نینگ اعضالریدن گل محمد رسولی نینگ سوزلریگه کوره، مملکت اهالیسی قشاق‌لیک سبب غرب دولت‌لریگه کیتیش‌گه یوز کیلتیرگن‌لر و حکومت ایسه فرمان صادر قیلیش بیلن ملت‌نینگ بودجه‌سیدن سابق جمهور رییس اداره‌سی اوچون بودجه اختصاص بیرمس‌لیگی کیره‌ک.
شونینگ‌دیک باشقه بیر قطار سناتورلرهم مذکور فرمان صادر ایتیلیشی‌گه مخالفت بیلدیرگن‌لر. جناب غنی‌نینگ مذکور فرمانی سابق جمهور رییس حامد کرزی‌گه امتیاز بیریش دیگن‌لر.
عین حالده، اوتگن کون پارلمان‌ده سوزله‌گن افغانستان مالیه وزیری اکلیل حکیمی اوشبو فرمان صادر ایتیلگنی باره‌سیده خبر‌سیز ایکن‌لیگی‌نی ایتگن ایدی. مجلس‌نینگ بیرینچی اورین باسری محمدعلم ایزدیار، دولت بلند مرتبه‌لی رسمیلریگه امتیاز بیریش قانون‌ده کیلمه‌گن دیب، جمهور رییس غنی هم بونده‌ی فرمان صادر قیلمس‌لیگی ضرور دیگن.
