کابل شهری یشاوچیلریدن بیرقطاری، مذکور شهرده جنایی جرملر کوپه‌یگنیدن خواطر بیلدیریب ایتیشیچه، بو شهرده قتل، اوغیرلیک و آدم اوغیرلاوچیلیک کونساین کوپه‌یماقده.
اولرگه کوره، کابل شهری نینگ هر بیر ناحیه‌سیده گناه‌سیز کیشی‌لر قوراللی کیشی‌لر تامانیدن اولدیریله‌دی و پولیس کوچلری بونده‌ی واقعه‌لر آلدی آلینیشی و عامللری توتقونگه آلینیشی توغریسیده هیچ بیر ایش قیلمه‌یدی.
باشکینت یشاوچیلری حکومت‌دن تیزلیک‌که کابل شهری خوفسیزلیگی تأمین‌لنیشی نی سوره‌گن.
شونینگدیک، امنیتی ایش بیلرمانلردن بیرقطاری نینگ ایتیشیچه، مملکت اینیقسه کابل‌ده ناتینچلیک‌لر کینگه‌یگنی اهالی‌نی جدی شکلده خواطرگه سالگن.
امنیتی ایش بیلرمان عبدالغفار گردیزی نینگ ایتیشیچه، کابل شهریده جنایی جرملر کوپه‌یگنینی اصل سببی، عامللری حکومت تامانیدن جزالنتیریلمه‌گنی دیر.
جناب گردیزی گه کوره، باشقه تاماندن امنیتی اداره‌لرده قطار کیشی‌لر کابل شهری ناتینچلیگی‌دن منفعت قولگه کیریته‌دی و اولر بو وضعیت اوزگریشینی ایستمه‌یدیلر.
بیراق، کابل پولیس قومندانلیگی سوزلاوچیسی فردوس فرامرزنینگ ایتیشیچه، کابل شهری نینگ خوفسیزلیک وضعیتی اوتمیش گه نسبتن یخشی بولگن و جنایی جرملر میزانی کمه‌یگن.
جناب فرامرزگه کوره، کابل شهری نینگ خوفسیزلیگی تأمین‌لنیشی اوچون خاص شکلده امنیتی تدبیر آلینگن.
کابل پولیس قومندانلیگی نینگ مسؤوللری، جنایی جرملر میزانی کمه‌یگنی و جنایتچی‌لر قولگه آلینگنیدن خبر بیرگن بیرچاغده، باشکینت یشاوچیلری بو شهرده قتل، اوغیرلیک و آدم اوغیرلاوچیلیک کوپه‌یگنیدن شکایت قیله‌دیلر. سونگی بیر قضیه‌ده جاری هفته شنبه کونی کابل شهری نینگ 8- ناحیه‌سیده نماینده‌لر کینگشی نینگ مدنی کمیسیونی مصلحتچیسی مینه منگل، قوراللی کیشی‌لر آرقه‌لی اولدیریلدی.
