بوگون "یکشنبه" ایرته‌لب کابل مندوی‌سیده «میلاد مارکیتی» آت‌لی بیر سوداگرلیک مرکز اوت آلدی.
اوشبو یانغین ایرته‌لب ساعت 7:10 باشلب و توشدن سونگ ساعت 2:00 گه‌قدر دوام تاپگن.
یانغین اوچیرووچی‌لر 7 ساعت‌دن سونگ یانغینی اوچیرگنلر.
کابل پولیس قومندانلیگی‌نینگ سوزلاوچیسی بصیر مجاهد‌نینگ ایتیشیچه، یانغین بیرینچیدن بنا ایکنچی طبقه‌سیدن باشلنگن و تیزلیک‌که باشقه طبقه‌لرگه کینگی‌گن.
حاضرگه‌قدر یانغین‌نینگ قندی یوز بیرگنی و خسارات رقمی بیللی ایمس.
کابل پولیس قومندانلیگی سوزلاوچیسی‌نینگ کوپه‌یتیریشیچه، اوشبو بناده 300 دکان بار ایکن و اوت‌گه یانگن دکانلرنینگ رقمی بیللی ایمس.
عین‌حالده، صنعت و سوداگرلیک وزیرلیگی‌نینگ سوزلاوچیسی مسافر قوقندی‌نینگ ایتیشیچه، شونینگ‌دیک یانغین‌لرده کوپراغ ساتووچی‌لر و کسبه‌کارلر زیان کوره‌دی.
کابل مندوی‌سیده دکاندارلر بیرلشمه‌سی‌نینگ باشلیغی خواجه معصوم‌نینگ ایتیشیچه، بیرینچیدن بیر میزنینگ اوت آلگنی سبب، یانغین باشله‌گن.
آیاق قابی ساتووچی بازاریده‌گی دکاندارلردن بیری لاجوردنینگ ایتیشیچه، اوشبو بازارده اوچ دکانی اوت آلگن.
عین‌حالده، ایچکی ایشلر وزیرلیگی‌نینگ ایتیشیچه، کابل مندوی‌سیده اوشبو یانغین یوز بیریشی بیلن 13 اوغیری بو محلدن قولگه آلینگن.
ایچکی ایشلر وزیرلیگی‌نینگ بیر خبرنامه آرقه‌لی ایتیشیچه، ایکی اوغیری کابل مندوی‌سیده بولگن بیر دکاندن 10 میلیون پاکستان‌لیک کلدارنی اوغیرله‌گن ایکن بیراق بیرینچی حوزه پولیسی تامانیدن قولگه آلینیب و پول قیته‌دن ایگه‌سیگه تاپشیریلگن.
کابل مندوی‌سیده اوتگن 7 ییل جریانیده بو 3- مرته که یانغین یوز بیره‌دی.
1391-ییل قیش موسومیده کابل مندوی‌سیده بیر سوداگرلیک مارکیت اوت آلگنی‌دن سونگ، مملکت مالیه وزیرلیگی یانغین بیمه‌سینی اجباری قیلدی. ایکی ییل آلدین هم اوشبو منطقه‌ده بیر ایاق قابی ساتووچی سرای کابل صورتده یانگن ایدی.
