میلادی 1972- ییل‌ده بیرلشگن ملت‌لر تشکیلاتی انسان و یشش محیط توغریسیده بیر ییغین یولگه قوییب و 5- جون نی یشش محیط خلق ارا کونی صفتیده آت قویدی. اوندن سونگ، هر ییل اوشبو کون بوتون دنیاده یشش محیط خلق ارا کونی صفتیده نشانلنه‌دی.
بوگون کابل‌ده شو مناسبت توغریسیده یولگه قوییلگن ییغینده، کابل حاکمی یعقوب حیدری، اوشبو شهرده یشش محیط توغریسیده خواطر بیلدیریب ایتیشیچه، کابل‌ده یشش محیط وضعیتی اقتصادی و امنیتی وضعیت‌دن یمانراق دیر و اونگه جدی شکلده دقت قیلینیشی کیره‌ک.
جناب حیدری‌نینگ ایتیشیچه، یالغیز کابل شهریده هر کون 4 تُن پلاستیکی اخلت چیقاریله‌دی و اوتگن 10 ییل‌ده مذکور شهرده تورت یریم میلیون تُن اخلت کومیلگن.
شو یوزه‌دن، کابل حاکمی گه کوره، یشاوچیلر یشش محیط‌نی سقلش اوچون پلاستیکی ظرف‌لر و خریطه‌لرگه بدیل تاپیشی کیره‌ک؛ چونکه کابل جمعیتی کوپه‌یماقده دیر و بو جریان یشش محیط وضعیتی‌نی هم یمان قیلماقده.
بونگه قوشیمچه جناب حیدری‌نینگ ایتیشیچه، پلاستیکی اخلت‌لر یانیده، خشت پیشیره‌دیگن مینگ‌لرچه داش کابل‌ده معیارسیز شکلده فعالیت قیله‌دی و دولت اولرنینگ فعالیتی گه توسیق بولیشی کیره‌ک.
اوشبو ییغینده کابل بیلیم یورتی باشلیغی حمیدالله فاروقی‌نینگ ایتیشیچه، یشش محیط‌نی سقلش بوتون یشاوچیلرنینگ مسؤولیتی دیر و کابل بیلیم یورتی‌ده یشش محیط فاکولته‌سی ایجاد ایتیلیشی و بو توغریده علمی و تخنیکی تدقیقات‌لرگه زمینه یره‌تیلیشی ایجابی نتیجه بیرگن.
دنیا رقم‌لریگه کوره، هر بیر ساعت‌ده بوتون دنیاده بیر میلیون پلاستیکی بوتل ایشلب چیقاریله‌دی و هر ییل اقیانوس‌لرده 13 میلیون تُن پلاستیک چیقاریله‌دی.
یشش محیط‌نی سقلش اوچون اهالی‌نی آگاه‌لنتیریش و یشش محیط بوزیلیشی گه قرشی کوره‌ش توغریسیده قرار آلیش اوچون سیاستچی‌لرنی ترغیب ایتیش 5- جون یشش محیط خلق ارا کونی صفتیده تعیین ایتیلیش مقصدلریدن ایدی.
