افغانستان جمهورلیک ریاستی مطبوعات دفتری سرپرستی شاه‌حسین مرتضوی‌نینگ ایتیشیچه، مملکت ایچکی ایشلر وزیری و ملی خوفسیزلیک عمومی ریاستی باشلیغی دن تشکیل ایتیلگن بیر هیأت پاکستان گه سفر قیلگن و بو هیأت افغانستان ایچکی ایشلریگه پاکستان اره‌لشی توغریسیده‌گی حجت‌نی مذکور مملکت رسمی‌لریگه تاپشیره‌دی.
جمهورلیک ریاستی مطبوعات دفتری سرپرستی شاه‌حسین مرتضوی‌نینگ سلام‌وطندارگه ایتیشیچه، ایچکی ایشلر وزیری ویس احمد برمک و ملی خوفسیزلیک عمومی ریاستی باشلیغی معصوم استانکزی، اسلام‌آباد کیتگن‌لر و بو امنیتی رسمی‌لر، عصیانچیلردن پاکستان حمایه قیلیشینی کورسته‌دیگن حجت‌نی مذکور مملکت رسمی‌لریگه تاپشیره‌دیلر.
شنبه کون کابل‌ده یوز بیرگن قانلی ترورچیلیک هجوم دن سونگ، افغانستان و پاکستان آره‌سیده‌گی علاقه ایلگریدن کوره ساووقلشگن.
اوتگن کون پاکستان میدیاسی تامانیدن بیریلگن گزارش گه کوره، پاکستان باش وزیری شاهد خاقان عباسی، افغانستان جمهور رییسی محمداشرف غنی بیلن تلیفون علاقه قورماقچی بولگن؛ بیراق جمهور رییس غنی سوزلش‌گه حاضر بولمه‌گن.
بیراق، پاکستان بوییچه افغانستان ایلچیسی حضرت عمر زاخیلوال‌نینگ ایتیشیچه، پاکستان باش وزیری، جمهور رییس غنی بیلن تلیفون علاقه قورمه‌گن؛ بلکیم جمهور رییس گه بیر پیام یوبارگن و بو پیام دن سونگ، جمهور رییس غنی اسلام‌آبادگه هیأت یوبارگن.
باشقه تاماندن، پاکستان تشقی ایشلر وزیرلیگی سوزلاوچیسی محمدفیصل‌نینگ ایتیشیچه، اوشبو مملکت اوتگن میلادی ییل نوامبر آیی‌ده عصیانچیلرگه تیگیشلی 27 کیشی‌لیک بیر گروه‌نی افغانستان حکومتی گه تاپشیرگن؛ بیراق افغانستان حکومتی‌نینگ رسمی‌لری بو خبرنی رد قیلگن‌لر.
