افغانستان جمهور رئیسی محمداشرف غنی نینگ بویروغی اساسیده، افغانستان مستقل‌لیگی نینگ 100 ییل‌لیگی کوتیب آلینیشی اوچون کابل شهری نینگ دارالامان منطقه‌سیده مملکت نینگ 34 ولایتیدن آلیب کیلینه‌دیگن توپراق دن بیر باب جامع مسجدنی تمل تاشی قوییب و قوریله‌دی.
مملکت ولایت‌لری نینگ محلی مسؤوللری گه کوره، ولایت‌لردن کابل گه توپراق انتقال بیریش جریانی باشلنگن.
تخار حاکمی سوزلاوچیسی جواد هجری نینگ سلام‌وطندارگه ایتیشیچه، تخارنینگ 16 تومنیدن توپراق توپلنگن و شو هفته جریانیده کابل گه انتقال بیریله دی.
اونگه کوره، توپراق انتقال بیریش جریانی ولایت رسمی‌لری نینگ حضوریده خاص بیر مراسم ده باشلنگن.
شونینگدیک، ننگرهار حاکمی سوزلاوچیسی عطاءالله خوگیانی نینگ ایتیشیچه، مذکور ولایت نینگ 3 تومنیدن 3 متر مکعب توپراق توپله‌نیب و کابل گه یوباریلگن.
عین حالده، بامیان حاکمی سوزلاوچیسی عبدالرحمان احمدی نینگ ایتیشیچه، کابل‌ده جامع مسجد قوریلیشی اوچون بامیان نینگ 8 اداری واحدی دن 24 متر مکعب توپراق توپله‌نیب کابل گه یوباریلگن.
کابل‌ده حکومتی رسمی‌لرنینگ ایتیشیچه، دارالامان منطقه‌سیده قوریله‌دیگن جامع مسجدنینگ قوریلیش ایشی اداری ایشلر اداره‌سی نینگ عملیاتی بولیمی آرقه‌لی آلغه آلیب باریله‌دی.
