مدني بنسټونه ادعا کوي، چې ځينې حکومتي چارواکي وسلهوالو مخالفینو ته په غیر قانوني توګه د کانونو د کیندلو زمینه برابره کړې، چې ګټه یې د دولت وسله والو مخالفینو ته رسیږي او د دغه کار زمینه ورته حکومتي چارواکو برابره کړې ده.
د مدني بنسټونو استازو په کابل کې د کانونو په هکله د دولت خپور کړي ریپوټ په غبرګون وویل، د دولت خپور شوی راپور نیمګړی دی او د کره معلوماتو په خپرولو کې ناغېړي کړې ده.
د افغانستان د روڼتیا څار بنسټ اجرایوي مشر سید اکرام افضلي له ۳۰ ډېرو مدني بنسټونو په استازولۍ خبري غونډې ته وویل، د روڼتیا نوښت ۵ راپور په ډاګه کوي، چې د کانونو او ماليې وزارتونو د کان د عایداتو مدریت ډېر کمزوری دی.
افضلي زیاته کړه، د وزارت په کچه یو شمېر حکومتي چارواکي د دولت مخالفو وسله والو ډلو ته په ناقانونه توګه د کانونو کیندلو زمینه برابروي.
دی وايي، په ځینو ځایونو کې یو شمېر چارواکي په لوی لاس امنیت ګډوډوی، چې ترڅو وکولی شي کانونه وکیندي.
په غونډه کې د طبعي زېرمو او چاپېریال ساتنې کمېسیون مشر وویل، په تېرو دوو کلونو کې حکومت د کانونو سکتور ته جدي پام نه دی کړی.
دی وایي، هر کال د کانونو د ناقانونه کیندلو له لارې ۳۰۰ میلیونه ډالر د دولت مخالفو وسله والو ډلو جیبونو ته ورځي.
د کانونو وزارت د پلټنې رییس محمدعلي بهسودي د مدني بنسټونو څرګندونې تاییدوي او وایي، د دولت وسله والو ډلو ته تر ډېره په ناقانونه توګه د کانونو کیندلو په برخه کې سیمه ییز چارواکي او زورواکي زمینه برابروي.
بهسودي دا مني، چې د کانونو وزارت د کان مدیرت په برخه کې ستونزې لري؛ خو اوس تر ډېره دغه ستونزې لرې شوي دي.
د مدني بنسټونو استازي وایي، کانونه ملي شتمني ده او دولت باید د کانونو کیندلو او عوایدو په هکله خلکو ته سم معلومات ورکړي؛ له دې پرته به دوی غلي نه شي پاتې او غږ به اوچت کړي.
