اجتماعی ایشلر بوییچه پکتیا حاکمی اورین باسری نینگ ادعا قیلیشیچه، طبیعی و عادی شکلده ولادت قیلهدیگن عیاللر مذکور ولایت نینگ ولایتی کسلخانهسیده سزارین (عملیات) بولهدی.
اجتماعی ایشلر بوییچه پکتیا حاکمی اورین باسری زهره احمدزی نینگ ایتیشیچه، مذکور ولایت نینگ ولایتی کسلخانه داکترلری اوزلریگه تعیینلنگن مقصدگه ایریشش اوچون حاملهدار عیاللرنی عملیات قیلهدیلر.
اونینگ ایتیشیچه، اوشبو کسلخانه داکترلری ایتگن کیم، بیر آی گه قطار کیشیلرنی عملیات قیلیش اوچون اولرگه هدف تعیینلنگن و تعیینلنگن مقصدگه ایریشمهگن صورتده، آیلیکلری تولنمهیدی.
گرچند بوندن آلدین پکتیا ولایتی کسلخانهسی داکترلری عیاللرنی کیرهکسیز سزارین قیلگنلری توغریسیده ایریم مِشمِشلر بار ایدی، بیراق بو بیرینچی مرته کیم حکومتی بیر رسمی بوندی بیر ادعا قیلهدی.
شونینگدیک کسللر پایوازلریدن قطاری نینگ ایتیشلریچه، پکتیا ولایتی کسلخانهسی نینگ داکترلری جدی احتیاج بولمسدن حاملهدار عیاللرنی سزارین قیلهدیلر. قطار داکترلرنینگ ایتیشیچه، پکتیا ولایتی کسلخانهسیده یالغیز بیر متخصص عیال بار کیم، یالغیزلیکده ولادت قیلهدیگن برچه عیاللرگه یتیشه آلمهیدی.
بیراق پکتیا عامهساغلیک ریاستی باشلیغی ولایتخان احمدزی اجتماعی ایشلر بوییچه پکتیا حاکمی اورین باسری نینگ ادعالرینی رد قیلیب ایتیشیچه، عامهساغلیک وزیرلیگی نینگ پالیسیسی اساسیده، طبیعی شکلده ولادت قیله آلمهگن قطار حاملهدار عیاللر جدی احتیاج اساسیده، سزارین بولهدیلر.
اونگه کوره، ینگی لایحه اساسیده، ساغلیک ایشلاوچیلری آیلیکلری نینگ 80 فایزی نی آلهدیلر و اولرنینگ آیلیگیدن یالغیز 20 فایزی تعیینلنگن مقصد اساسیده تولنهدی.
پکتیا عامهساغلیک ریاستی باشلیغی تعیینلنگن مقصد توغریسیده هیچ بیر نرسه دیمهیدی، بیراق پکیتا ولایتی کسلخانهسی داکترلریدن بیری آتی فاش ایتیلیشی نی ایستمهی سلاموطندارگه ایتیشیچه، بیر آی آقمیده 60 دن آرتیق حاملهدار سزارین بولهدیلر.